കൊച്ചി: എല്‍.ഡി.എഫ് സ്ഥാനാര്‍ഥി പി. രാജീവിന്റെ മൂന്നാംഘട്ട പൊതുപര്യടനം തീരദേശമണ്ണായ വൈപ്പിനില്‍ തുടങ്ങി. വീടുകള്‍ക്ക് മുമ്പിലൂടെ പര്യടനം കടന്നുപോകുമ്പോള്‍ വെള്ളവും, പഴങ്ങളും നല്‍കിയാണ് വീട്ടമ്മമാര്‍ സ്ഥാനാര്‍ഥിയെ യാത്രയാക്കിയത്. ചാപ്പ കടപ്പുറത്തെ അങ്കണവാടി പരിസരത്ത് നടന്ന സ്വീകരണ യോഗത്തില്‍ ഷൈന്‍ എബി അന്തിക്കാട് മരത്തില്‍ പണിത വാല്‍ക്കണ്ണാടി രാജീവിന് സമ്മാനിച്ചു. സ്‌കൂള്‍ മുറ്റത്തെ സ്വീകരണത്തില്‍ സ്ഥാനാര്‍ഥിയെ സ്വീകരിച്ചത് സി.പി.എം വളപ്പ് സൗത്ത് ബ്രാഞ്ച് സെക്രട്ടറിയായ രാജേഷ് എടപ്പങ്ങാടിന്റെയും ഫെലിക്‌സ് സിയയുടെയും ഇരട്ടക്കുട്ടികളായ അന്ന മരിയയും അഭിന സെലിയും ചേര്‍ന്നാണ്. വന്‍കിട ഫ്‌ളാറ്റുകള്‍ക്കും സമുച്ചയങ്ങള്‍ക്കും സി.ആര്‍.എസ് നിയമത്തില്‍ വലിയ ഇളവുകളാണ് കേന്ദ്രത്തില്‍ നേരത്തെ കോണ്‍ഗ്രസും ഇപ്പോള്‍ ബി.ജെ.പിയും ചെയ്തുകൊടുത്ത് കൊണ്ടിരിക്കുന്നതെന്ന് പി. രാജീവ് പറഞ്ഞു.
തീരദേശവാസികള്‍ക്കും മല്‍സ്യത്തൊഴിലാളികള്‍ക്കും അത്തരത്തിലുള്ള ഇളവുകള്‍ ലഭിക്കുന്നില്ല. നിലവിലുള്ള വീടുകള്‍ പോലും പുതുക്കി പണിയാന്‍ കഴിയാത്ത സാഹചര്യമാണ് മേഖലയില്‍ സാധാരണക്കാര്‍ നേരിടുന്നത്. തീരദേശവാസികള്‍ക്കും മത്സ്യത്തൊഴിലാളികള്‍ക്കും സി.ആര്‍.എസ് നിയമത്തില്‍ ഇളവുകള്‍ നല്‍കണമെന്ന് ഇടതുപക്ഷം നേരത്തെ തന്നെ അവശ്യപ്പെട്ടിട്ടുള്ളതാണ്. കുറേക്കൂടി മെച്ചപ്പെട്ട ജീവിതത്തിനായി ഒന്നിച്ച് ഇടതുപക്ഷത്തോടൊപ്പം മുന്നേറാമെന്നും രാജീവ് കൂട്ടിചേര്‍ത്തു. വൈപ്പിന്‍ മണ്ഡലത്തിലെ മൂന്നാം ഘട്ട പൊതുപര്യനടത്തിനിടയില്‍ ഞാറക്കലില്‍ സംസാരിക്കുകയായിരുന്നു അദ്ദേഹം.
എളങ്കുന്നപ്പുഴ, കിഴക്കേനട, പുക്കാടുപാലം, കര്‍ത്തേടംപള്ളി പരിസരം, പി.കെ പ്രഭാകരന്‍ റോഡ് ജംഗ്ഷന്‍, പെരുമാള്‍പടി മത്സ്യ തൊഴിലാളി സഹകരണ സംഘം പരിസരം, മാലിപ്പുറം, വളപ്പ് ജംഗ്ഷന്‍, സ്‌കൂള്‍ മുറ്റം എം.ബി രാജന്‍ പരിസരം, വളപ്പ് ബീച്ച് എ.എസ് ജംഗ്ഷന്‍, ചാപ്പക്കടപ്പുറം അങ്കണവാടി പരിസരം, മഞ്ഞനക്കാട് ബോട്ട് ജെട്ടിയിലെ സ്വീകരണത്തിനിടയില്‍ പ്രോഫാത്ത് വയലാത്ത് മത്സ്യ സംസ്‌കരണ പ്ലാന്റിലും പെരുമ്പിള്ളി ബസ് സ്റ്റോപ്പ്, കിഴക്കേ അപ്പങ്ങാട്, മഞ്ഞനക്കാട് ബോട്ട് ജെട്ടി, പുല്ലൂറ്റ്പറമ്പ് വടക്കേ വശം, ലവ്വേഴ്‌സ് വായനശാല, ചെറുപുഷ്പാലയം, ഒ.എല്‍.എച്ച് കോളനി, ഇരുമ്പുപാലം, ആശുപത്രിപ്പടി എന്നിവിടങ്ങളിലും രാജീവ് പര്യടനം നടത്തി.