കരുവാരകുണ്ട്: കല്‍കുണ്ടിലെ ജനവാസ കേന്ദ്രത്തില്‍ പുലികളിറങ്ങി. ആര്‍ത്തല കോളനിക്കു സമീപത്തെ മറ്റത്തില്‍ ടോമിയുടെ ഫാമിലെ കൂട് തകര്‍ത്താണ് രണ്ടു ആടുകളെ പുലി വകവരുത്തിയത്. വ്യാഴാഴ്ച രാത്രിയാണ് സംഭവം. കാളികാവ് റെയ്ഞ്ച് ഫോറസ്റ്റ് അധികൃതര്‍ സ്ഥലം സന്ദര്‍ശിക്കുകയും പുലിയാണന്ന് സ്ഥിരീകരിക്കുകയും ചെയ്തു.
കല്‍കുണ്ടിലെ ആര്‍ത്തല കോളനിക്കു സമീപം മറ്റത്തില്‍ ടോമിയുടെ ഫാമില്‍ വളര്‍ത്തുന്ന അടുകളെയാണ് പുലികള്‍ ഭക്ഷണമാക്കിയത്. ഫാമില്‍ നാല്‍പതോളം ആടുകളെയാണ് വളര്‍ത്തിയിരുന്നത്. ഇരുമ്പുകമ്പികള്‍ ഉപയോഗിച്ചു നിര്‍മിച്ചിരിക്കുന്ന കൂടിന്റെ ഒരു ഭാഗത്തെ കമ്പി വളച്ചാണ് പുലികള്‍ ഫാമിനുള്ളില്‍ കടന്നത്. ആടുകളില്‍ രണ്ടെണ്ണത്തിനെ ഫാമിനുള്ളില്‍ നിന്നും വലിച്ചിഴച്ച് കൊണ്ടുപോയി. ഒന്നിന്റെ കാലിലെ ഒരു ഭാഗത്തെ മാംസം നഷ്ടപ്പെട്ടിട്ടുണ്ട്. ഒന്‍പതിലധികം ആടുകളെ കടിച്ച് പരുക്കേല്‍പ്പിക്കുകയും ചെയ്തതായി ഉടമ പറഞ്ഞു. കൂടിനുള്ളില്‍ രക്തം തളംകെട്ടി നില്‍ക്കുന്നുണ്ട്. വെള്ളിയാഴ്ച കരുവാരകുണ്ട് വെറ്റിനറി സര്‍ജന്‍ സജീവ് കുമാര്‍ സ്ഥലത്തെത്തി ആടുകളുടെ മുറിവുകള്‍ പരിശോധിച്ചു. ആടുകളെ ആക്രമിച്ചത് പുലിതന്നെയാണന്ന് വെറ്ററിനറി സര്‍ജന്‍ സ്ഥിതീകരിച്ചിട്ടുണ്ട്.