തിരുവനന്തപുരം: അരിവില വര്‍ധനയുടെ പേരില്‍ ക്രമക്കേടുകള്‍ നടക്കുന്നതായി ശ്രദ്ധയില്‍പ്പെട്ടതിന്റെ അടിസ്ഥാനത്തില്‍ ലീഗല്‍ മെട്രോളജി ഉദ്യോഗസ്ഥര്‍ പ്രത്യേക പരിശോധനകള്‍ നടത്തി. മിന്നല്‍ പരിശോധനയില്‍171 കേസുകളെടുത്തു. 2,56,000 രൂപ പിഴ ഈടാക്കി.
223 സ്ഥാപനങ്ങള്‍ പരിശോധിച്ചു. അളവിലും തൂക്കത്തിലും കുറവ് വരുത്തിയതിന് അഞ്ച് കേസുകള്‍ രജിസ്റ്റര്‍ ചെയ്ത് ഏഴായിരം രൂപയും, അളവില്‍ കുറവ്, മറ്റ് നിയമലംഘനങ്ങള്‍ എന്നിവയ്ക്ക് 33 കേസുകളും രജിസ്റ്റര്‍ ചെയ്ത് 38,000 രൂപയും, പായ്ക്കറ്റുകളില്‍ നിയമാനുസൃതമായ പ്രഖ്യാപനങ്ങള്‍ ഇല്ലാത്തതിന് നൂറ്റി നാല് കേസുകള്‍ രജിസ്റ്റര്‍ ചെയ്ത് 1,76,000 രൂപയും പിഴ ഈടാക്കി.
അധികവില ഈടാക്കിയതിന് മൂന്ന് കേസുകള്‍ രജിസ്റ്റര്‍ ചെയ്തു. നിയമലംഘനങ്ങള്‍ക്ക് 22 കേസുകള്‍ രജിസ്റ്റര്‍ ചെയ്ത് 35,000 രൂപയും പിഴ ഈടാക്കി.
അളവിലെയും തൂക്കത്തിലെയും കൃത്യത ഉറപ്പ് വരുത്തുക, അളവുതൂക്ക ഉപകരണങ്ങളിലെ കൃത്രിമങ്ങള്‍, യഥാസമയം മുദ്ര ചെയ്യാത്ത അളവുതൂക്ക ഉപകരണങ്ങളുടെ ഉപയോഗം എന്നിവ തടയുക,(എം.ആര്‍.പി.യേക്കാള്‍ കൂടുതല്‍ വില ഈടാക്കുക) എന്നീ നിയമലംഘനങ്ങളാണ് പരിശോധനയില്‍ കണ്ടെത്തിയത്.
നിരന്തര പരിശോധനകള്‍ തുടരുമെന്നും, നിയമലംഘനങ്ങള്‍ ഒഴിവാക്കി കോടതി നടപടിയും മറ്റും ഒഴിവാക്കുന്നതിന് വ്യാപാരികള്‍ പ്രത്യേകം ശ്രദ്ധിക്കണമെന്നും ലീഗല്‍ മെട്രോളജി കണ്‍ട്രോളര്‍ അറിയിച്ചു.