പറമ്പിക്കുളം: പറമ്പിക്കുളത്ത് ശല്യക്കാരായ ആനകളെ വിരട്ടുവാന്‍ റബര്‍ ബുള്ളറ്റ് ഗണ്ണുമായി പൊലിസുകാരെ നിയോഗിക്കും .കെ ബാബു എം.എല്‍.എയുടെ നേത്യത്വത്തില്‍ തേക്കടി കോളനിയില്‍ ചേര്‍ന്ന ആലോചനായോഗത്തിലാണ് തീരുമാനമായത്.
ആനയെ വിരട്ടുവാന്‍ ആദ്യം റബര്‍ ബുള്ളറ്റ് ഉപയോഗിക്കും. ഇതിനായി റബര്‍ ബുള്ളറ്റ് കൈകാര്യം ചെയ്യുന്ന രണ്ടു പൊലീസുകാരുടെ സേവനം ഉപയോഗിക്കും. ഇതിലും ആനകളെ വിരട്ടുവാന്‍ സാധിച്ചില്ലെങ്കില്‍ കൂടുതല്‍ സുരക്ഷിത ഭാഗത്തേക്ക് ആനകളെ മാറ്റും. തേക്കടി, അല്ലി മൂപ്പന്‍, 30 ഏക്കര്‍, ഒറവന്‍ പാടി കോളനിവാസികള്‍ക്ക് സൗജന്യ റേഷന്‍ കിറ്റുകള്‍ വിതരണം നടത്തും.
ജനവാസ മേഖലക്കു ചുറ്റുമുള്ള തകരാറിലായ വൈദ്യുത വേലി അറ്റകുറ്റപണികള്‍ നടത്തി പുനസ്ഥാപിക്കും. കോളനികളില്‍ ട്രഞ്ച് വെട്ടുവാന്‍ നടപടിയെടുക്കും. ഇതിനായി വനംവകുപ്പിനോട് എസ്റ്റിമേറ്റ് എടുക്കുവാന്‍ ആവശ്യപ്പെട്ടു. കാട്ടാന ശല്യം വര്‍ദ്ധിച്ചാല്‍ തേക്കടി അല്ലി മൂപ്പന്‍ കോളനി കമ്മ്യൂണിറ്റി ഹാളിനു മുകളില്‍ ഷെഡ് കെട്ടുവാന്‍ ഫണ്ട് അനുവദിക്കും. ചെമ്മണാമ്പതി തേക്കടി റോസ് ട്രക്ക് പത്ത് നിര്‍മ്മാണവും ഒറവന്‍ പാടി കോളനി റോഡ് നവീകരിക്കണമെന്നും ആദിവാസികള്‍ ആവശ്യപ്പെട്ടു. ചിറ്റൂര്‍ തഹസില്‍ദാര്‍ വി.കെ.രമ ,മുതലമട പഞ്ചായത്ത് പ്രസിഡന്റ് ബേബി സുധ, ജില്ലാ പട്ടികജാതി ഓഫിസര്‍ ,പഞ്ചായത്ത് അംഗം ശ്രീധരന്‍, ഡപ്യൂട്ടി തഹസില്‍ദാര്‍ എ.പുരുഷോത്തമന്‍ ,ജില്ല പട്ടിക വര്‍ഗ ഓഫിസര്‍ വിപിന്‍ദാസ്, നെന്മാറ ഡി.എഫ്.ഒ.ശശികുമാര്‍ , പി.രാജീവ് യോഗത്തില്‍ പങ്കെടുത്തു.