ന്യൂഡല്‍ഹി: സനാതന ധര്‍മ പരാമര്‍ശവുമായി ബന്ധപ്പെട്ട് തമിഴ്‌നാട് ഉപമുഖ്യമന്ത്രി ഉദയനിധി സ്റ്റാലിനെതിരെ കോടതിയുടെ അനുമതിയില്ലാതെ പുതിയ കേസുകള്‍ രജിസ്റ്റര്‍ ചെയ്യരുതെന്ന് സുപ്രിം കോടതി. വിവിധ സംസ്ഥാനങ്ങളിലായി ഉദയനിധിക്കെതിരെ എഫ്.ഐ.ആര്‍ രജിസ്റ്റര്‍ ചെയ്തതിലെ അനൗചിത്യം ചോദ്യംചെയ്ത് ഉദയനിധി നല്‍കിയ ഹരജിയില്‍ വാദം കേള്‍ക്കുകയായിരുന്നു കോടതി. 

2023 സെപ്തംബറില്‍ ഉദയനിധി നടത്തി ഒരു പരാമര്‍ശമാണ് വിവാദമായത്. സനാതന ധര്‍മം ഡെങ്കിയെയും മലേറിയയെയും പോലെയാണെന്നും തുടച്ചുനീക്കണമെന്നുമായിരുന്നു പരാമര്‍ശം. ഇതിനെതിരെ രാജ്യവ്യാപകമായി ബി.ജെ.പി ഉള്‍പ്പെടെയുള്ള പാര്‍ട്ടികള്‍ രംഗത്തെത്തിയിരുന്നു. ഹിന്ദുവികാരം വ്രണപ്പെടുത്തുകയാണ് ഉദയനിധി ചെയ്തതെന്നായിരുന്നു വിമര്‍ശനം. പരാമര്‍ശം പിന്‍വലിക്കണമെന്നും ആവശ്യപ്പെട്ടു.  എന്നാല്‍ ജാതീയ വിവേചനത്തെയാണ് താന്‍ വിമര്‍ശിച്ചതെന്ന്  പ്രതികരിച്ച ഉദയനിധി തന്റെ പരാമര്‍ശത്തില്‍ ഉറച്ചുനില്‍ക്കുന്നതായും പ്രഖ്യാപിച്ചു.

മുതിര്‍ന്ന അഭിഭാഷകനായ എസ്.എം. സിങ്‌വിയാണ് ഉദയനിധിക്കായി കോടതിയില്‍ ഹാജരായത്. പരാമര്‍ശം മതവികാരം വ്രണപ്പെടുത്തുന്നതായി അംഗീകരിക്കാനാകില്ലെന്ന് പറഞ്ഞ അദ്ദേഹം സമാന രീതിയില്‍ മുസ്‌ലിം വിഭാഗമുള്‍പ്പെടെ മറ്റ് മതങ്ങളെ അപകീര്‍ത്തിപ്പെടുത്തിയ സംഭവങ്ങളില്‍ നേതാക്കള്‍ക്കെതിരെ കേസില്ലെന്നും ചൂണ്ടിക്കാട്ടി.  നുപൂര്‍ ശര്‍മയുടെ വിദ്വേഷ പരാമര്‍ശമുള്‍പ്പെടെ എടുത്തു പറഞ്ഞായിരുന്നു അദ്ദേഹത്തിന്റെ വാദം. 

മഹാരാഷ്ട്രയിലും ബിഹാറിലും ഉള്‍പ്പെടെ ഉദയനിധിക്കെതിരെ കേസുണ്ട്. കേസില്‍ തല്‍ക്കാലം തുടര്‍നടപടികള്‍ പാടില്ലെന്ന് നിര്‍ദ്ദേശിച്ച കോടതി, തുടര്‍വാദം ഏപ്രില്‍ 28ലേക്ക് മാറ്റിയിരിക്കുകയാണ്.