കൊടുങ്ങല്ലൂര്‍: പരിശുദ്ധ ഹജ്ജ് കര്‍മത്തില്‍ പങ്കാളിത്തം വഹിക്കാന്‍ ചേരമാന്‍ ജുമാ മസ്ജിദ് മഹല്ല് പ്രസിഡന്റിന് സഊദി രാജാവിന്റെ ക്ഷണം .
ഇന്ത്യയിലെ സൗദി നയതന്ത്രകാര്യാലയമാണ് വിവരം കൈമാറിയത്.
ഹജ്ജ് കര്‍മത്തില്‍ അതിഥിയായി ചേരമാന്‍ ജുമാ മസ്ജിദ് മഹല്ല് പ്രസിഡന്റ് ഡോ. പി.എ മുഹമ്മദ് സഈദ് ആണ് പങ്കെടുക്കുക.
ഇന്ത്യയില്‍ നിന്നും ഒരു മഹല്ല് പ്രസിഡന്റ് സൗദി രാജാവിന്റെ അതിഥിയായി ഹജ്ജ് കര്‍മത്തിനെത്തുന്നത് ഇതാദ്യം.
നൂറ്റാണ്ടുകള്‍ക്ക് മുന്‍പ് മക്കയില്‍ നിന്നും ഇസ്്‌ലാം മത സന്ദേശവുമായി എത്തിയ മാലിക് ദിനാറിനെയും സംഘത്തെയും ഇരു കൈയ്യും നീട്ടി സ്വീകരിച്ച മുസിരിസ് ഇന്ത്യന്‍ ഉപഭൂഖണ്ഡത്തിലെ ആദ്യത്തെ മുസ്്‌ലിം ദേവാലയത്തിന് ഇടമൊരുക്കി.
കാലമേറെ കഴിഞ്ഞ് ഇന്ത്യയിലെ ആദ്യത്തെ മുസ്്‌ലിം ദേവാലയത്തിന്റെ പ്രതിനിധി അതിഥിയായി മക്കയിലേക്ക് തിരിക്കുമ്പോള്‍ അത് രണ്ടു കാലഘട്ടങ്ങള്‍ക്കിടയില്‍ കാലം വിരിക്കുന്ന പരവതാനിയായി മാറും.