കൊണ്ടോട്ടി: സംസ്ഥാനത്തെ ഗ്രാമ- ബ്ലോക്ക്-ജില്ലാ പഞ്ചായത്തുകളിലെ 555 ഇടങ്ങളില്‍ വരുന്ന തെരഞ്ഞെടുപ്പില്‍ വനിതകള്‍ പ്രസിഡന്റാകും.

തദ്ദേശ സ്വയംഭരണ വകുപ്പ് സ്‌പെഷ്യല്‍ സെക്രട്ടറിയാണ് ത്രിതല പഞ്ചായത്തുകളിലെ അധ്യക്ഷന്മാരുടെ വനിത, ജനറല്‍, പട്ടികജാതി, പട്ടികവര്‍ഗ വിഭാഗങ്ങളുടെ എണ്ണം നിശ്ചയിച്ച് ഉത്തരവിറക്കിയത്. എന്നാല്‍, സംവരണ തദ്ദേശ സ്ഥാപനങ്ങളെ നിശ്ചയിക്കുന്നതിനുള്ള നറുക്കെടുപ്പ് കൊവിഡ് വ്യാപനത്തെ തുടര്‍ന്ന് നടത്താനായിട്ടില്ല.

സംസ്ഥാനത്തെ 941 ഗ്രാമപഞ്ചായത്തുകളില്‍ 471 ഇടങ്ങളിലാണ് വനിതകള്‍ പ്രസിഡന്റാവുക. ഇതില്‍ 417 ഗ്രാമപഞ്ചായത്തുകളിലും ജനറല്‍ വനിതാ സംവരണമാണ്. 46 ഇടങ്ങളില്‍ പട്ടികജാതി സ്ത്രീ സംവരണവും എട്ടിടങ്ങളില്‍ പട്ടികവര്‍ഗ സ്ത്രീ സംവരണവുമാണ്. 416 ഗ്രാമപഞ്ചായത്തുകളില്‍ ജനറല്‍ വിഭാഗത്തില്‍പ്പെട്ട പ്രസിഡന്റുമാരായിരിക്കും. ഇതില്‍ 46 ഇടങ്ങളില്‍ പട്ടികജാതി സംവരണവും എട്ടെണ്ണം പട്ടികവര്‍ഗ സംവരണവുമാണ്.

സംസ്ഥാനത്തെ 152 ബ്ലോക്ക് പഞ്ചായത്തുകളില്‍ 77 ഇടങ്ങളിലാണ് വനിതകള്‍ പ്രസിഡന്റാവുക. ഇതില്‍ 67 വനിതകള്‍ ജനറല്‍ വിഭാഗത്തിലും എട്ടെണ്ണം പട്ടികജാതി വനിതാ സംവരണവും രണ്ടെണ്ണം പട്ടികവര്‍ഗ വനിതാ സംവരണവുമാണ്. 67 പ്രസിഡന്റുമാരാണ് ജനറല്‍ വിഭാഗത്തിലുണ്ടാവുക. ഏഴ് പ്രസിഡന്റ് പദവി പട്ടികജാതി വിഭാഗത്തിനും ഒരെണ്ണം പട്ടികവര്‍ഗ വിഭാഗത്തിനുമാണ്. 14 ജില്ലാ പഞ്ചായത്തുകളില്‍ ഏഴെണ്ണത്തിലും പ്രസിഡന്റുമാര്‍ വനിതകളായിരിക്കും. ശേഷിക്കുന്ന ആറെണ്ണം ജനറലും ഒരെണ്ണം പട്ടികജാതി സംവരണവുമാണ്. തദ്ദേശ സ്ഥാപനങ്ങളില്‍ നിലവില്‍ പുറത്തിറക്കിയ അന്തിമ വോട്ടര്‍പട്ടികയിലും പുരുഷന്മാരെക്കാള്‍ കൂടുതല്‍ സ്ത്രീകളാണ്.