കൊച്ചി: കേരള സ്റ്റാര്‍ട്ടപ്പ് മിഷന്‍  വിദ്യാര്‍ഥികള്‍ക്കായി നടത്തിയ ഇന്നൊവേഷന്‍സ് അണ്‍ലോക്ഡ് എന്ന പരിപാടിയില്‍ പ്രദര്‍ശിപ്പിക്കപ്പെട്ടത്  മാസ്‌ക് വെന്‍ഡിങ് മെഷിന്‍ മുതല്‍ കൊവിഡ് രോഗം കണ്ടെത്തുന്നതിനുള്ള സോഫ്റ്റ് വെര്‍ വരെയുള്ള ഉത്പന്നങ്ങള്‍. 

ലോക്ഡൗണ്‍ കാലത്ത് കൊവിഡ് പ്രതിരോധത്തിനായി കണ്ടുപിടിച്ച നൂതനാശയങ്ങളും മാതൃകകളുമാണ് ഈ വെര്‍ച്വല്‍ പരിപാടിയില്‍ അവതരിപ്പിച്ചത്. മുന്നൂറിലേറെ വിദ്യാര്‍ഥികള്‍ പരിപാടിയില്‍ രജിസ്റ്റര്‍ ചെയ്തിരുന്നു. 

150 ല്‍ പരം ആശയങ്ങളും മാതൃകകളുമാണ് പരിപാടിയില്‍ അവതരിപ്പിച്ചത്. ഇതില്‍ 21 മാതൃകകളെ സ്റ്റാര്‍ട്ടപ്പ് മിഷന്‍  പ്രാഥമിക വിലയിരുത്തലിനു ശേഷം തെരഞ്ഞെടുത്തു.

രാജ്യത്ത് ഇതാദ്യമായാണ് സംസ്ഥാന സര്‍ക്കാരിന്റെ നേതൃത്വത്തില്‍ കൊവിഡ് പശ്ചാത്തലമാക്കി നൂതനാശയങ്ങള്‍ അവതരിപ്പിക്കാന്‍ വിദ്യാര്‍ഥികള്‍ക്ക് അവസരം നല്‍കുന്ന വെര്‍ച്വല്‍ എക്‌സ്‌പോ സംഘടിപ്പിക്കുന്നത്. വാധ്വാനി ഫൗണ്ടേഷന്‍, ടി.സി.എസ് ഡിസ്‌ക് എന്നിവരാണ് പരിപാടിയുടെ ഭാഗമായി നടന്ന നൂതനാശയരംഗത്തെ മാസ്റ്റര്‍ ക്ലാസ് സെഷനുകള്‍ കൈകാര്യം ചെയ്തത്.

അടിയന്തിര ചികിത്സാ ഉപകരണങ്ങള്‍, ആള്‍ക്കൂട്ട നിയന്ത്രണം, നിര്‍മ്മിത ബുദ്ധി ഉപയോഗിച്ചുള്ള സമ്പര്‍ക്കരഹിത ഉപകരണങ്ങള്‍, വലിയ ഇടങ്ങള്‍ സാനിറ്റൈസ് ചെയ്യാനുള്ള സാങ്കേതിക വിദ്യ, പരിശോധനാ ഉപകരണങ്ങള്‍, പി.പി.ഇ എന്നിവയിലാണ് വിദ്യാര്‍ഥികള്‍ തങ്ങളുടെ നൂതനാശയങ്ങളും ഉപകരണങ്ങളും അവതരിപ്പിച്ചത്. 

സംസ്ഥാനത്തെ വിവിധ എന്‍ജിനീയറിങ് കോളജുകളിലെ വിദ്യാര്‍ഥി സംഘങ്ങളുടെ ഉത്പന്നങ്ങള്‍ക്ക് പുറമെ ജി.വി.എച്.എസ്.എസ് മടപ്പള്ളി, ജി.എച്.എസ്.എസ് മീനങ്ങാടി എന്നിവിടങ്ങളില്‍ നിന്നുള്ള വിദ്യാര്‍ഥികളുടെ ഉത്പന്നങ്ങളും ഇവയില്‍ പെടും.

സംസ്ഥാന ഉന്നത വിദ്യാഭ്യാസ പ്രിന്‍സിപ്പല്‍ സെക്രട്ടറി ഉഷ ടൈറ്റസ് ഇന്നൊവേഷന്‍സ് അണ്‍ലോക്ഡ് ഉദ്ഘാടനം ചെയ്തു. നൂതനാശയങ്ങളുടെ സംഗ്രഹവും ഉഷ ടൈറ്റസ് പുറത്തിറക്കി.