കോഴിക്കോട്: പ്രധാനമന്ത്രി നരേന്ദ്രമോദി പങ്കെടുത്ത കോഴിക്കോട്ടെ പരിപാടിയില്‍ ഡ്യൂട്ടിക്കുണ്ടായിരുന്ന പൊലിസുകാരി കുഴഞ്ഞുവീണു.
സ്റ്റേജിന് മുന്‍വശത്ത് ഡ്യൂട്ടിയിലുണ്ടായിരുന്ന പൊലിസുകാരിയാണ് കുഴഞ്ഞുവീണത്. പ്രധാനമന്ത്രി എത്തുന്നതിന് തൊട്ടുമുന്‍പാണ് സംഭവം. സ്വാഗത പ്രഭാഷണം നടക്കവെ ക്ഷീണം അനുഭവപ്പെട്ട ഇവരെ ഒപ്പമുണ്ടായിരുന്ന സഹപ്രവര്‍ത്തകര്‍ താങ്ങിയെടുത്ത് കസേരയില്‍ ഇരുത്തി. വെള്ളം നല്‍കിയ ശേഷം വിശ്രമിച്ച ശേഷമാണ് ഇവര്‍ ഡ്യൂട്ടിയില്‍ തുടര്‍ന്നത്.
പ്രധാനമന്ത്രിയുടെ സന്ദര്‍ശനവുമായി ബന്ധപ്പെട്ട് കമാന്‍ഡോകളും സായുധസേനാ വിഭാഗവും ഉള്‍പ്പെടെ 2000 പൊലിസ് ഉദ്യോഗസ്ഥരെയാണ് നഗരത്തില്‍ വിന്യസിച്ചിരുന്നത്. പൊരിവെയിലില്‍ വെള്ളം കുടിക്കാതെയും ഭക്ഷണം കഴിക്കാതെയുമാണ് പലരും ജോലി ചെയ്തത്. പ്രധാനമന്ത്രി എത്താനും മണിക്കൂറുകള്‍ വൈകി.