കരുനാഗപ്പള്ളി: ഒ.പി കൗണ്ടറിനു മുന്നില്‍ ഡോക്ടറെ കാണാന്‍ രോഗികള്‍ ക്യൂ നിന്ന് വലയുന്ന കാഴ്ച കരുനാഗപ്പള്ളി താലൂക്ക് ആശുപത്രിയില്‍ ഇനി ഓര്‍മ്മയാകും. ആയിരത്തഞ്ഞൂറിലധികം പേര്‍ ദിനംപ്രതി ഒ.പിയിലെത്തുന്ന കരുനാഗപ്പള്ളി താലൂക്ക് ആശുപത്രിയില്‍ ഇനി തിക്കും തിരക്കുമില്ലാതെ രോഗികള്‍ക്ക് ഡോക്ടര്‍മാരെ കണ്ടു മടങ്ങാം. ആശുപത്രിയിലെത്തുന്ന രോഗികളുടെ സൗകര്യാര്‍ത്ഥം നഗരസഭ നടപ്പിലാക്കുന്ന ഒ.പി കൗണ്ടറിലെ ടോക്കണ്‍ സംവിധാനത്തിനു തുടക്കമായി. ഇനി മുതല്‍  കാണേണ്ട ഡോക്ടറുടെ പേരും ടോക്കണ്‍ നമ്പരും രോഗികള്‍ക്ക് നല്‍കും. ഒ.പിയിലുള്ള ഡോക്ടര്‍മാരുടെ കൗണ്ടറുകള്‍ക്കു മുന്നില്‍ ഇലക്ട്രോണിക് ഡിസ്‌പ്ലേ യൂണിറ്റുകള്‍ സ്ഥാപിച്ച് ടോക്കണ്‍ നമ്പരുകള്‍ ഇതിലൂടെ പ്രദര്‍ശിപ്പിക്കുന്ന മുറയ്ക്ക് രോഗികള്‍ക്ക് ഡോക്ടര്‍മാരെ കാണാം.
ഇതു വഴി പരിശോധനമുറിയ്ക്ക് മുന്നിലെ തിക്കും തിരക്കും ഇല്ലാതാകും. കൂടാതെ ആശുപത്രിയിലെ ലാബ് സംവിധാനങ്ങള്‍ ഉള്‍പ്പടെ കമ്പ്യൂട്ടര്‍വല്‍ക്കരിക്കുകയും ചെയ്തു. ഇതു വഴി ലാബ് റിസര്‍ട്ടുകളും മറ്റും അപ്പപ്പോള്‍ തന്നെ ഡോക്ടര്‍മാരുടെ കമ്പ്യൂട്ടറുകളിലെത്തും. ഇതുമൂലം ലാബുകള്‍ക്കു മുന്നില്‍ ലാബ് റിസള്‍ട്ടുകള്‍ക്കായി കാത്തു നില്‍ക്കേണ്ട കാര്യവുമില്ലാതായി. ആശുപത്രി സൗകര്യങ്ങള്‍ രോഗീ സൗഹൃദമായി ആധുനികവല്‍ക്കരിക്കുന്നതിന്റെ ഭാഗമായാണ് പദ്ധതി നടപ്പിലാക്കുന്നതെന്ന് നഗരസഭാ അധികൃതര്‍ പറഞ്ഞു. ഒ.പി കൗണ്ടറില്‍ ടോക്കണ്‍ സംവിധാനം ഏര്‍പ്പെടുത്തുന്നതിന്റ ഉദ്ഘാടനം നഗരസഭാ അധ്യക്ഷ എം.ശോഭന നിര്‍വഹിച്ചു. ആരോഗ്യസ്ഥിരം സമിതി അധ്യക്ഷ സുബൈദാ കുഞ്ഞുമോന്‍ അധ്യക്ഷത വഹിച്ചു. ആശുപത്രി സൂപ്രണ്ട് തോമസ് അല്‍ഫോണ്‍സ് സ്വാഗതം പറഞ്ഞു. നഗരസഭാ കൗണ്‍സിലര്‍മാരായ പനക്കളങ്ങര സുരേഷ്, സി.വിജയന്‍ പിള്ള, എം.കെ. വിജയഭാനു, എസ്.ശക്തികുമാര്‍ ,എന്‍.സി ശ്രീകുമാര്‍, നസിം, മുനമ്പത്ത് ഗഫൂര്‍, ആശാ അനില്‍, ആര്‍.എം.ഒ ഡോ. കിരണ്‍, എ. വിജയന്‍ തുടങ്ങിയവര്‍ പങ്കെടുത്തു.