ഫെറാറ: സ്പാലിന്റെ പോരാട്ടവീര്യത്തിന് മുന്നില്‍ യുവന്റസിന്റെ കിരീടമോഹങ്ങള്‍ വൈകി. ജയത്തോടെ തുടര്‍ച്ചയായ എട്ടാം കിരീടമോഹവുമായി ഇറങ്ങിയ യുവന്റസിനെ 2-1നാണ് സ്പാല്‍ തകര്‍ത്തുവിട്ടത്.

സീരി എ ചരിത്രത്തില്‍ ഏറ്റവും വേഗത്തില്‍ കിരീടം നേടാമെന്ന റെക്കോര്‍ഡ് ഇതോടെ യുവന്റസ് കളഞ്ഞുകുളിച്ചു. സീസണില്‍ യുവന്റസിന്റെ രണ്ടാം തോല്‍വിയാണിത്. ചാംപ്യന്‍സ് ലീഗ് രണ്ടാംപാദം മുന്നില്‍ കണ്ട് സൂപ്പര്‍ താരങ്ങള്‍ക്ക് വിശ്രമം നല്‍കി ഇറങ്ങിയ യുവന്റസ് 30ാം മിനുട്ടില്‍ യുവതാരം മോയിസ് കീനിലൂടെ ലീഡെടുത്തെങ്കിലും രണ്ട് ഗോള്‍ തിരിച്ചടിച്ച് സ്പാല്‍ ചാംപ്യന്മാരെ ഞെട്ടിച്ചു. 1957നാണ് സ്പാല്‍ അവസാനമായി സീരി എയില്‍ യുവന്റസിനെ പരാജയപ്പെടുത്തിയത്. 49ാം മിനുട്ടില്‍ ബൊനിഫാസിയിലൂടെ തിരിച്ചടിച്ച സ്പാല്‍ 74ാം മിനുട്ടില്‍ ഫ്‌ലൊക്കാരിയിലൂടെ ലീഡെടുത്തു. യുവന്റസ് തിരിച്ചടിക്കാന്‍ ശ്രമം നടത്തിയെങ്കിലും പ്രതിരോധം ശക്തപ്പെടുത്തി സ്പാല്‍ ഗോള്‍ശ്രമങ്ങള്‍ തടയുകയായിരുന്നു.

പരാജയത്തോടെ 32 മത്സരത്തില്‍ 84 പോയിന്റാണ് ഇപ്പോള്‍ യുവന്റസിന് ഉള്ളത്. രണ്ടാമതുള്ള നാപോളിക്ക് 64 പോയിന്റും. ഇനി എല്ലാ മത്സരങ്ങളും വിജയിച്ചാല്‍ പോലും നാപോളിക്ക് 85 പോയിന്റ് മാത്രമേ ആകു. അതുകൊണ്ട് തന്നെ അവസാന ആറു മത്സരങ്ങളില്‍ രണ്ട് പോയിന്റ് മാത്രം മതി യുവന്റസിന് കിരീടം നേടാന്‍. ഇന്ന് നടക്കുന്ന മത്സരത്തില്‍ നാപോളി പരാജയപ്പെട്ടാലും യുവന്റസിന് കിരീടം നേടാം.