കാഞ്ഞങ്ങാട്: തെരഞ്ഞെടുപ്പ് വിജയത്തില്‍ ആഹ്ലാദ പ്രകടനം നടത്തുന്നതിനിടെ വീടുകള്‍ക്കു നേരെയും പൊലിസിനു നേരെയും കല്ലെറിഞ്ഞ സംഭവത്തില്‍ സി.പി.എം പ്രവര്‍ത്തകര്‍ക്കെതിരേ ഹൊസ്ദുര്‍ഗ് പൊലിസ് കുറ്റപത്രം സമര്‍പ്പിച്ചു. 2016 മേയ് 19 നാണ് കേസിനാസ്പദമായ സംഭവം നടന്നത്. കൂളിയങ്കാലില്‍  ബൈക്കിന് തീയിട്ടതായി വിവരമറിഞ്ഞ ഹൊസ്ദുര്‍ഗ്  സി.ഐ യു പ്രേമനും സിവില്‍ പൊലിസ്  ഉദ്യോഗസ്ഥന്മാരും സ്ഥലത്തെത്തുന്നതിനിടയിലാണ് സി.പി.എം പ്രവര്‍ത്തകരുടെ ആഹഌദ പ്രകടനം പ്രദേശത്തെത്തിയത്. ഇതിനിടയില്‍ ലീഗ് ഓഫിസ്  അടിച്ചു പൊളിക്കുകയും ലീഗ് പ്രവര്‍ത്തകന്റെ വീടിന് നേരെ കല്ലെറിയുകയുമുണ്ടായി.
അക്രമികളെ പിന്തിരിക്കാന്‍ ശ്രമിച്ചപ്പോഴാണു പൊലിസിനു നേരെയും കല്ലേറുണ്ടായത്. സംഭവത്തില്‍ പൊലിസുകാരുടെ  കൃത്യ നിര്‍വഹണം തടസപ്പെടുത്തിയതിനാണ് സി.പി.എം പ്രവര്‍ത്തകര്‍ക്കെതിരേ കേസെടുത്തത്.
അതിയാമ്പൂരിലെ പ്രതീഷ്(31), പൊയ്യക്കരയിലെ രജ്ഞിത്ത്(23), മാണിക്കോത്തെ ബിജു(38), ചൂരിവയലിലെ ശ്രീജേഷ്(31), കരുവളത്തെ സുധീഷ്(26), നെല്ലിക്കാട്ടെ ഉണ്ണികൃഷ്ണന്‍(36), അതിയാമ്പൂരിലെ അശോകന്‍(50), ദിലീപ്(33), കൊളവയലിലെ സുധീഷ്(26), ഷാജി (37), കാറ്റാടി ഗിരീഷ്(38) തുടങ്ങിയ നൂറോളം സി.പി.എം പ്രവര്‍ത്തകര്‍ക്കെതിരേയാണ് കുറ്റപത്രം സമര്‍പ്പിച്ചത്.