ആലപ്പുഴ: ആലപ്പുഴയിലെ പി.കൃഷ്ണപിള്ള സ്മാരകം തീവെച്ചു നശിപ്പിച്ച കേസിലെ പ്രതികളെ കോടതി വെറുതെ വിട്ടു. തെളിവുകള്‍ ഇല്ലെന്ന് ചൂണ്ടിക്കാട്ടിയാണ് ആലപ്പുഴ ജില്ലാ പ്രിന്‍സിപ്പല്‍ സെഷന്‍സ് കോടതിയാണ് പ്രതികളെ വെറുതെ വിട്ടത്. അപ്പോള്‍ യഥാര്‍ഥ പ്രതികളാരായിരുന്നുവെന്ന സംശയവും ബലപ്പെടുകയാണ്. സി.പി.എമ്മിലെ വിഭാഗീയതയാണ് ആക്രമണത്തിന് പിന്നില്‍ എന്നായിരുന്നു ക്രൈംബ്രാഞ്ചിന്റെ കണ്ടത്തല്‍.

കേസില്‍ സി.പി.എം പ്രാദേശിക നേതാക്കളാണ് പ്രതികളായിരുന്നത്. മുന്‍ മുഖ്യമന്ത്രി വി.എസ് അച്യുതാനന്ദന്റെ പെഴ്സണല്‍ സ്റ്റാഫ് അംഗമായിരുന്ന ലതീഷ് ചന്ദ്രനും പ്രതിയായിരുന്നു. ലതീഷ് അടക്കം അഞ്ചു പ്രതികളെയാണ് കോടതി ഇപ്പോള്‍ കുറ്റമുക്തരാക്കിയത്. സംഭവത്തില്‍ പ്രതികളായ അഞ്ചുപേരെയും പാര്‍ട്ടി പുറത്താക്കിയിരുന്നു.
2013 ഒക്ടോബര്‍ 31ന് പുലര്‍ച്ചെയാണ് ആലപ്പുഴ കഞ്ഞിക്കുഴി കണ്ണര്‍കാട്ടുള്ള കൃഷ്ണപിള്ള സ്മാരകം തകര്‍ക്കപ്പെട്ടത്. പി.കൃഷ്ണപിള്ള താമസിച്ച ചെല്ലിക്കണ്ടത്ത് വീടിന് തീയിടുകയും പ്രതിമ അടിച്ച് തകര്‍ക്കുകയും ആയിരുന്നു.

കോടതി വിധിയില്‍ സന്തോഷമുണ്ടെന്ന് കുറ്റമുക്തനാക്കപ്പെട്ട ലതീഷ് പറഞ്ഞു. തങ്ങളുടെ നിരപരാധിത്വം കോടതിയ്ക്ക് ബോധ്യമായി. കോടതി വിധിയുടെ പശ്ചാത്തലത്തില്‍ സി.പി.എം നേതൃത്വം തങ്ങളെ പാര്‍ട്ടിയിലേക്ക് തിരിച്ചെടുക്കുമെന്നാണ് പ്രതീക്ഷയെന്നും കൃഷ്ണപിള്ള സ്മാരകം നശിപ്പിച്ച സംഭവത്തിലെ യഥാര്‍ത്ഥ പ്രതികളെ കണ്ടെത്താനുള്ള നിയമപോരാട്ടം തുടരുമെന്നും ലതീഷ് ചന്ദ്രന്‍ കൂട്ടിച്ചേര്‍ത്തു.