കോട്ടയം: ഗുണ്ടാ സംഘത്തലവനും നിരവധി ഗുണ്ടാ ആക്രമണക്കേസുകളില്‍ പ്രതിയുമായ അമ്മഞ്ചേരി സിബിക്കെതിരെ പൊലിസ് കാപ്പ ചുമത്തി. അതിരമ്പുഴ വില്ലേജില്‍ മാന്നാനം കരയില്‍ അമലഗിരി ഭാഗത്ത്  ഗ്രേസ് കോട്ടേജില്‍ ജോണ്‍ മകന്‍ സിബി ജി ജോണിനെ(34)യാണ് ജില്ലാ പൊലിസ് മേധാവിയുടെ റിപ്പോര്‍ട്ടിന്റെ അടിസ്ഥാനത്തില്‍ ജില്ലാ കലക്ടര്‍ ഗുണ്ടാ ലിസ്റ്റില്‍പ്പെടുത്തിയത്. ഇതേ തുടര്‍ന്നു സിബിയെ ഗാന്ധിനഗര്‍ എസ.്‌ഐ എം.എസ് ഷിബുവിന്റെ നേതൃത്വത്തില്‍ അറസ്റ്റ് ചെയ്ത് റിമാന്‍ഡ് ചെയ്തു.
  മാര്‍ച്ച് അവസാനവാരം എസ്എഫ്‌ഐ ജില്ലാ പ്രസിഡന്റിനെ ആക്രമിച്ചു പരുക്കേല്‍പ്പിച്ച സംഭവത്തില്‍ സിബിയെ പ്രതി ചേര്‍ത്ത് കസ്റ്റഡിയില്‍ എടുത്തിരുന്നു. എസ്.എഫ.്‌ഐ ജില്ലാ പ്രസിഡന്റിനെ എം.ജി സര്‍വകലാശാല ആസ്ഥാനത്ത് വച്ച് ഗുണ്ടാ സംഘം വെട്ടിപ്പരുക്കേല്‍പ്പിക്കുകയായിരുന്നു. ഗുണ്ടാ സംഘത്തലവന്‍ സിബിയുടെ നേതൃത്വത്തിലുള്ള ഗുണ്ടകലാണ് ആക്രമണം നടത്തിയതെന്നു പൊലീസ് കണ്ടെത്തിയിരുന്നു. ഗാന്ധിനഗര്‍, കുറവിലങ്ങാട് എന്നീ പൊലീസ് സ്റ്റേഷനുകളില്‍ സിബിയ്‌ക്കെതിരെ ക്രിമിനല്‍ കേസുകള്‍ നിലവിലുണ്ട്.
  ഏറ്റുമാനൂര്‍ കേന്ദ്രീകരിച്ചുള്ള ബ്ലേഡ് മാഫിയ സംഘങ്ങളുമായി അടുത്ത ബന്ധമുണ്ടായിരുന്ന സിബി, ഈ ബന്ധം ഉപയോഗിച്ചാണ് ഗാന്ധിനഗര്‍ കേന്ദ്രീകരിച്ച് ഗുണ്ടാപ്രവര്‍ത്തനങ്ങള്‍ നടത്തിയിരുന്നത്. സിബിയ്‌ക്കെതിരെയുള്ള കേസുകളുടെ റിപ്പോര്‍ട്ട് ശേഖരിച്ച ശേഷം ജില്ലാ പൊലിസ് മേധാവി ജില്ലാ കലക്ടര്‍ക്കു റിപ്പോര്‍ട്ട് സമര്‍പ്പിക്കുകയായിരുന്നു. ഇതേ തുടര്‍ന്നാണ് സിബിയെ ഗുണ്ടാപട്ടികയില്‍ ഉള്‍പ്പെടുത്തി കരുതല്‍ തടങ്കലില്‍ അയച്ചത്.