ന്യൂഡല്‍ഹി: ഹൈക്കോടതിയിലെ മീഡിയാ റൂം അടച്ചുപൂട്ടിയതുമായി ബന്ധപ്പെട്ടു കേരളാ പത്രപ്രവര്‍ത്തക യൂനിയന്‍ (കെ.യു.ഡബ്ലിയു.ജെ) നല്‍കിയ ഹരജി സുപ്രിം കോടതി തീര്‍പ്പാക്കി. ഹൈക്കോടതി ഫുള്‍ ബഞ്ച് കേസ് കേള്‍ക്കാന്‍ തീരുമാനിച്ച സാഹചര്യത്തില്‍ കേസ് തീര്‍പ്പാക്കുന്നതായി ഇന്നലെ ജഡ്ജിമാരായ യു.യു ലളിത്, എ.എം സപ്രേ എന്നിവരടങ്ങിയ രണ്ടംഗ സുപ്രിം കോടതി ബഞ്ച് വ്യക്തമാക്കി.

ഹൈക്കോടതി റിപ്പോര്‍ട്ടിങ്ങിനു മാര്‍ഗരേഖ ആവശ്യമാണോയെന്നു പരിശോധിക്കാന്‍ ഹൈക്കോടതിയില്‍ അഞ്ചംഗ ബഞ്ച് രൂപീകരിച്ചിട്ടുണ്ട്. ഈ ബഞ്ച് മീഡിയാ റൂമിലെ പ്രവേശനം അടക്കമുള്ള വിഷയങ്ങളും പരിഗണിക്കുമെന്നു ഹൈക്കോടതി അറിയിച്ചതിനെ തുടര്‍ന്നാണ് കേസ് തീര്‍പ്പാക്കിയത്. മാധ്യമപ്രവര്‍ത്തകരും അഭിഭാഷകരും തമ്മിലുള്ള സംഘര്‍ഷത്തിന്റെ പശ്ചാത്തലത്തിലായിരുന്നു മീഡിയാ റൂം പൂട്ടിയിട്ടത്.
ഇരുപക്ഷത്തിനുമിടയിലെ പ്രശ്‌നങ്ങള്‍ക്കു പരിഹാരമില്ലാതിരിക്കുന്നതിനൊപ്പം മീഡിയാ റൂമിന്റെ കാര്യത്തിലും തീരുമാനം നീളുകയാണ്. ഇക്കാര്യത്തില്‍ ഹൈക്കോടതിക്കു നിര്‍ദേശം നല്‍കണമെന്നായിരുന്നു കെ.യു.ഡബ്ലിയു.ജെയുടെ ആവശ്യമെങ്കിലും കേസ് അഞ്ചംഗ ബഞ്ചിന്റെ പരിഗണയിലായതിനാല്‍ ഇടപെടുന്നില്ലെന്നു സുപ്രിംകോടതി ഇന്നലെ അറിയിച്ചു.
2016 ജൂലൈയിലാണ് ഹൈക്കോടതിയിലെ മീഡിയാ റൂമില്‍ മാധ്യമപ്രവര്‍ത്തകര്‍ക്കു പ്രവേശനം വിലക്കി മുറി പൂട്ടിയിട്ടത്. തുടര്‍ന്നു പത്രപ്രവര്‍ത്തക യൂനിയന്‍ സംസ്ഥാന ഘടകം സുപ്രിം കോടതിയെ സമീപിക്കുകയായിരുന്നു. മീഡിയാ റൂം മാധ്യമപ്രവര്‍ത്തകര്‍ക്കായി തുറന്നുനല്‍കണമെന്നായിരുന്നു ഹരജിയിലെ ആവശ്യം. മാസങ്ങള്‍ നീണ്ട വാദങ്ങള്‍ക്കു ശേഷമാണ് ഇപ്പോള്‍ കേസ് തീര്‍പ്പാക്കിയത്.