കരുളായി: പൂക്കോട്ടുംപാടം അഞ്ചാംമൈലിലെ ആക്രിക്കടയില്‍ പൊലിസ് നടത്തിയ പരിശോധനയില്‍ 6.75 ലിറ്റര്‍ അനധികൃതമായി സൂക്ഷിച്ച വിദേശമദ്യം പിടികൂടി. സംഭവുമായി ബന്ധപ്പെട്ട് അമരമ്പലം പുതിയക്കോട് നറുക്കില്‍ ഉണ്ണികൃഷ്ണനെ(66) അറസ്റ്റു ചെയ്തു.
രഹസ്യ വിവരത്തിന്റെ അടിസ്ഥാനത്തിലാണ് പൂക്കോട്ടുംപാടം പൊലിസ് ഉണ്ണികൃഷ്ണന്‍ അഞ്ചാംമൈലില്‍ അമരമ്പലം റോഡില്‍ നടത്തുന്ന ആക്രിക്കടയില്‍ പരിശോധന നടത്തുന്നത്. പരിശോധനക്കിടയില്‍ ആക്രിസാധനങ്ങള്‍ക്കിടയില്‍ സൂക്ഷിച്ച നിലയില്‍ 14 കുപ്പികളിലായാണ് വിദേശമദ്യം കണ്ടെത്തിയത്.
ആവശ്യക്കാര്‍ക്ക് ഉയര്‍ന്ന വിലയില്‍ വില്‍പ്പന നടത്താനാണ് ഇദ്ദേഹം മദ്യം സൂക്ഷിച്ചത്. ഇതിനുമുന്‍പും അനധികൃതമായി മദ്യം സൂക്ഷിച്ച് വില്‍പന നടത്തിയ കേസില്‍ ശിക്ഷ അനുഭവിച്ചു വരുന്ന ആളാണ് ഉണ്ണികൃഷ്ണന്‍. ഇയാളെ നിലമ്പൂര്‍ ഫസ്റ്റ്ക്ലാസ് മജിസ്‌ട്രേറ്റിന് മുന്‍മ്പില്‍ ഹാജരാക്കി റിമാന്റ് ചെയ്തു.
എസ്.ഐ ജോര്‍ജ്ജ് ചെറിയാന്‍, എ.എസ്.ഐ മാരായ എം.കെ നാസര്‍, പി.കെ രവികുമാര്‍ സി.പി.ഒ മാരായ എ.പി അന്‍സാര്‍, ടി.വിനീഷ് എന്നിവരടങ്ങുന്ന സംഘം പരിശോധനക്ക് നേതൃത്വം നല്‍കി.