കാസര്‍കോട്: കേരള ഗവര്‍ണര്‍ ജസ്റ്റിസ് പി സദാശിവം ഇന്ന് ജില്ലയില്‍ എത്തും. സത്യസായി ഓര്‍ഫനേജ് ട്രസ്റ്റ് പെരിയയില്‍ എന്‍ഡോസള്‍ഫാന്‍ ദുരിതബാധിതര്‍ക്കായി പണിത ടൗണ്‍ഷിപ്പ് ഉദ്ഘാടനം ചെയ്യാനാണു ഗവര്‍ണര്‍ പി സദാശിവം ജില്ലയിലെത്തുന്നത്. വൈകുന്നേരം മൂന്നിനു പെരിയ സത്യസായി ഗ്രാമത്തില്‍ നടക്കുന്ന ചടങ്ങില്‍ ഗവര്‍ണര്‍ പി സദാശിവം ടൗണ്‍ഷിപ്പ് ഉദ്ഘാടനം ചെയ്യും. സര്‍ക്കാര്‍ നല്‍കിയ അഞ്ചേക്കര്‍ സ്ഥലത്താണ് എന്‍ഡോസള്‍ഫാന്‍ ദുരിതബാധിതര്‍ക്കു സത്യസായി ഓര്‍ഫനേജ് ട്രസ്റ്റ് 36 വീടുകള്‍ നിര്‍മിച്ചു നല്‍കിയത്. ഈ വീടുകളുടെ താക്കോല്‍ദാനം കഴിഞ്ഞ ജനുവരി 19നു മുഖ്യമന്ത്രി പിണറായി വിജയന്‍ നിര്‍വഹിച്ചിരുന്നു. ഇതിനു സമീപത്താണ് ചില്‍ഡ്രന്‍സ് പാര്‍ക്ക്, വാട്ടര്‍ ടാങ്ക്, ആംഫി തിയേറ്റര്‍, കുളം, ആയുഷ് സെന്റര്‍ തുടങ്ങിയവയുള്‍പ്പെടുന്ന ടൗണ്‍ഷിപ്പ് നിര്‍മാണം പൂര്‍ത്തിയായത്.
ചടങ്ങില്‍ മന്ത്രി ഇ ചന്ദ്രശേഖരന്‍ അധ്യക്ഷനാവും. പി കരുണാകരന്‍ എം.പി, കെ കുഞ്ഞിരാമന്‍ എം.എല്‍.എ, ട്രസ്റ്റ് എക്‌സിക്യുട്ടിവ് ഡയറക്ടര്‍ കെ.എന്‍ ആനന്ദകുമാര്‍, പുല്ലൂര്‍ പെരിയ പഞ്ചായത്ത് പ്രസിഡന്റ് ശാരദ എസ് നായര്‍ സംബന്ധിക്കും.