കൊച്ചി: ബ്യൂട്ടിപാര്‍ലര്‍ വെടിവയ്പ് കേസില്‍ കാസര്‍കോട്ടെ ഗുണ്ടാ നേതാവ് മോനായിയുമായി ക്വട്ടേഷന്‍ ഉറപ്പിച്ചത് ഒന്നാംപ്രതി ബിലാലാണെന്ന് പൊലിസ്. മോനായിയെ പിടികൂടുന്നതിനായി ബിലാലിനെ കൂടുതല്‍ ചോദ്യം ചെയ്യുമെന്ന് പൊലിസ് പറഞ്ഞു. അതിനിടെ കേസില്‍ പിടിയിലായ വിപിന്‍ വര്‍ഗീസ്, അല്‍ത്താഫ് എന്നിവരെ 14 ദിവസത്തേക്ക് റിമാന്‍ഡ് ചെയ്തു. ബിലാലിനെ മൂന്ന് ദിവസത്തേക്ക് പൊലിസ് കസ്റ്റഡിയില്‍ വിട്ടിട്ടുണ്ട്. അതേസമയം, കേസില്‍ കൂടുതല്‍ പേര്‍ക്ക് പങ്കുള്ളതായി അന്വേഷണ സംഘം കണ്ടെത്തിയിട്ടുണ്ട്.
കേസില്‍ പങ്കുള്ള രണ്ട് പേരെ കൂടി അന്വേഷണ സംഘം തിരിച്ചറിഞ്ഞിട്ടുണ്ട്. ഇവരെ പിടികൂടാനുള്ള ശ്രമവും ക്രൈംബ്രാഞ്ച് നടത്തുന്നുണ്ട്. വെടിവെയ്പ് നടത്തിയ ബിലാല്‍, വിപിന്‍ വര്‍ഗീസ് എന്നിവരും ഇവര്‍ക്ക് ആയുധവും വാഹനവും എത്തിച്ച് നല്‍കിയ അല്‍ത്താഫുമായിരുന്നു ക്രൈം ബ്രാഞ്ചിന്റെ കസ്റ്റഡിയിലുണ്ടായിരുന്നത്. ഇവരുടെ കസ്റ്റഡി കാലാവധി ഇന്നലെ അവസാനിച്ചിരുന്നു. കൂടുതല്‍ വിവരങ്ങള്‍ ശേഖരിക്കുന്നതിനാണ് ബിലാലിനെ മൂന്ന് ദിവസത്തേക്ക് കസ്റ്റഡിയില്‍ വാങ്ങിയത്. ബിലാലിന്റെ നിര്‍ദേശ പ്രകാരമാണ് വിപിന്‍ വര്‍ഗീസ് കൂടെ നിന്നത്.
അധോലോക കുറ്റവാളി രവി പൂജാരയുടെ കാസര്‍കോട്ടെ ക്രിമിനല്‍ സംഘത്തലവന്‍ മോനായി വഴിയായിരുന്നു വെടിവെയ്പിനുള്ള ക്വട്ടേഷന്‍ ബിലാല്‍ ഏറ്റെടുക്കുന്നത്.