ന്യൂയോര്‍ക്ക്: ഈ വര്‍ഷത്തെ പുലിറ്റ്‌സര്‍ സമ്മാനജേതാക്കളില്‍ മ്യാന്മറിലെ ബുദ്ധതീവ്രവാദത്തിന്റെ നടുക്കുന്ന ദൃശ്യങ്ങള്‍ ഒപ്പിയെടുത്ത് ലോകത്തിനു നല്‍കിയ അന്വേഷണാത്മക റിപ്പോര്‍ട്ടും. പത്ത് റോഹിംഗ്യന്‍ മുസ്‌ലിംകളെ റാക്കയിനില്‍വച്ച് ബുദ്ധതീവ്രവാദികളും മ്യാന്മറിലെ സുരക്ഷാസേനയും ചേര്‍ന്ന് കൂട്ടക്കൊല ചെയ്ത റിപ്പോര്‍ട്ടിന് വാര്‍ത്താ ഏജന്‍സിയായ റോയിട്ടേഴ്‌സിനാണ് പുരസ്‌കാരം. പട്ടാളക്കാരുടെ കണ്ണില്‍ പെടാതെ സംഭവസ്ഥലത്തു ചെന്ന് റിപ്പോര്‍ട്ട് തയാറാക്കിയ യുവ റിപ്പോര്‍ട്ടര്‍മാരായ വാ ലോണും ക്യാവ് സോ ഊയും ജയിലിലടക്കപ്പെടുകയും ചെയ്തിരുന്നു. 490 ദിവസങ്ങള്‍ക്കു ശേഷമാണ് മ്യാന്മര്‍ പൗരന്മാരായ ഇരുവരും ജയില്‍മോചിതരായത്.
ഒരു കുഴിമാടത്തില്‍ നിറയെ അസ്ഥികള്‍ കണ്ട ഇവര്‍ ഇരകളുടെ കുടുംബങ്ങളെയും സാക്ഷികളെയും നേരില്‍ കണ്ടാണ് റിപ്പോര്‍ട്ട് തയാറാക്കിയത്. ഗ്രാമീണരില്‍നിന്ന് അവര്‍ക്ക് മൂന്നു ഫോട്ടോകള്‍ കിട്ടി. രണ്ടെണ്ണത്തില്‍ പത്ത് റോഹിംഗ്യരെ കൈകള്‍ ബന്ധിച്ച് മുട്ടിലിഴക്കുന്നതായിരുന്നു. മൂന്നാമത്തേതില്‍ ഇതേയാളുകളുടെ ശരീരത്തില്‍ വെടിയുണ്ടകളേറ്റതും ശരീരം ചിതറിയതും. 2017 ഡിസംബറില്‍ മ്യാന്മറിലെ കൂട്ടക്കുരുതി എന്ന അവരുടെ റിപ്പോര്‍ട്ട് പൂര്‍ത്തിയാക്കുന്നതിനു മുന്‍പേ ഇരുവരും അറസ്റ്റിലായി. ഇത്തരമൊരു സാമൂഹികപ്രതിബദ്ധതയുള്ള റിപ്പോര്‍ട്ട് തയാറാക്കിയ റിപ്പോര്‍ട്ടര്‍മാരെ ഓര്‍ത്ത് അഭിമാനിക്കുന്നതായി റോയിട്ടേഴ്‌സ് ചീഫ് എഡിറ്റര്‍ സ്റ്റീഫന്‍ ജെ. അഡ്‌ലര്‍ പറഞ്ഞു. മധ്യ അമേരിക്കന്‍ അഭയാര്‍ഥികള്‍ രക്ഷ തേടി അലയുന്ന ചിത്രത്തിനാണ് റോയിട്ടേഴ്‌സിന് മറ്റൊരു പുരസ്‌കാരം ലഭിച്ചത്. റോയിട്ടേഴ്‌സിന് ഇത് രണ്ടാം തവണയാണ് രണ്ട് പുലിറ്റ്‌സര്‍ സമ്മാനങ്ങള്‍ ലഭിക്കുന്നത്. അമേരിക്കയില്‍ ആള്‍ക്കൂട്ടത്തിനു നേരെ നടന്ന വെടിവയ്പിന്റെ ചിത്രത്തിനും പുരസ്‌കാരമുണ്ട്. ന്യൂയോര്‍ക്ക് ടൈംസ്, വാഷിങ്ടണ്‍ പോസ്റ്റ് എന്നിവക്കും രണ്ടുവീതം സമ്മാനങ്ങള്‍ ലഭിച്ചു.