ന്യൂഡല്‍ഹി: ഇന്ത്യയിലെ മുസ്‌ലിംകളെക്കുറിച്ച് പാകിസ്താന്‍ ആശങ്കപ്പെടേണ്ടതില്ലെന്ന് കേന്ദ്ര ആഭ്യന്തരമന്ത്രി രാജ്‌നാഥ് സിങ്. കശ്മീരിലെ സംഘര്‍ഷത്തിന് പിന്നില്‍ പാകിസ്താനാണെന്നും അദ്ദേഹം രാജ്യസഭയില്‍ പറഞ്ഞു.

സൈന്യം വധിച്ച ബുര്‍ഹാന്‍ വാനി ഒരു തീവ്രവാദിയാണ്. കൊലപാതകമടക്കം 15 ഓളം കേസുകളാണ് ഇയാളുടെ പേരില്‍ രജിസ്റ്റര്‍ ചെയ്തിരുന്നത്. സമൂഹമാധ്യമങ്ങളിലൂടെ യുവാക്കളെ വാനി ഭീകരവാദത്തിലേക്ക് ആകര്‍ഷിച്ചിരുന്നു.

ഇന്ത്യയിലെ മുസ്‌ലിംകളെക്കുറിച്ച് പാകിസ്താന്‍ ആശങ്കപ്പെടേണ്ടതില്ലെന്നും അവരെ സംരക്ഷിക്കാന്‍ ഇന്ത്യയ്ക്ക് അറിയാമെന്നും അദ്ദേഹം പറഞ്ഞു. കശ്മീരില്‍ വിഘടനവാദികളുമായാണ് സൈന്യം പോരാടുന്നത് തീവ്രവാദത്തിനെതിരായ പോരാട്ടത്തില്‍ രാഷ്ട്രീയം മറന്ന് എല്ലാവരും ഒരുമിക്കണമെന്നും അദ്ദേഹം പറഞ്ഞു.

'സംഘര്‍ഷം നടക്കുമ്പോള്‍ പ്രധാനമന്ത്രി വിദേശത്തായിരുന്നു. ഇന്ത്യയില്‍ തിരിച്ചെത്തിയ ഉടനെ ഉന്നതതല യോഗം വിളിച്ച് സ്ഥിതിഗതികള്‍ വിലയിരുത്തിയിരുന്നു. സമാധാന ചര്‍ച്ചകള്‍ എങ്ങനെ പുനരാരംഭിക്കണമെന്ന് മുഖ്യമന്ത്രി മെഹബൂബ മുഫ്തിയുമായി താന്‍ ആലോചിച്ചുകൊണ്ടിരിക്കുകയാണ്. മാരകമല്ലാത്ത ആയുധങ്ങള്‍ മാത്രമേ സമരക്കാരെ നേരിടാന്‍ ഉപയോഗിക്കാവൂ എന്ന് നിര്‍ദ്ദേശം നല്‍കിയിരുന്നു' രാജ്‌നാഥ് സിങ് വ്യക്തമാക്കി.