ചെന്നൈ: വെല്ലൂര്‍ ലോക്‌സഭാ മണ്ഡലത്തിലെ സ്ഥാനാര്‍ഥിയുടെ വസതിയില്‍നിന്ന് കോടിക്കണക്കിനു രൂപ പിടിച്ചെടുത്തതിനെത്തുടര്‍ന്ന് പോളിങ് റദ്ദാക്കിയ തെരഞ്ഞെടുപ്പ് കമ്മിഷന്റെ നടപടി മദ്രാസ് ഹൈക്കോടതി ശരിവച്ചു. വോട്ടെടുപ്പ് റദ്ദാക്കിയ കമ്മിഷന്റെ നടപടി ചോദ്യംചെയ്തുള്ള ഒരുകൂട്ടം ഹരജികള്‍ തള്ളിയാണ് ഹൈക്കോടതി നടപടി. ഇതോടെ തമിഴ്‌നാട്ടില്‍ ആകെയുള്ള 39 മണ്ഡലങ്ങളില്‍ വെല്ലൂര്‍ ഒഴിച്ചുള്ള സീറ്റുകളിലാവും രണ്ടാംഘട്ടത്തിന്റെ ഭാഗമായി ഇന്ന് വോട്ടെടുപ്പ് നടക്കുക.

വെല്ലൂരിലെ ഡി.എം.കെ സ്ഥാനാര്‍ഥി കതിര്‍ ആനന്ദിന്റെ വസതിയിലും ഓഫിസിലും ഗോഡൗണില്‍ നിന്നുമായി ആദായ നികുതി വകുപ്പ് നടത്തിയ റെയ്ഡില്‍ 11 കോടിയോളം രൂപയാണ് പിടിച്ചെടുത്തത്. ഇതോടെ മണ്ഡലത്തില്‍ വോട്ടെടുപ്പ് നിര്‍ത്തിവയ്ക്കണമെന്ന് കേന്ദ്രതെരഞ്ഞെടുപ്പ് കമ്മിഷന്‍ രാഷ്ട്രപതിക്കു ശുപാര്‍ശചെയ്യുകയും രാഷ്ട്രപതി ഇക്കാര്യം അംഗീകരിക്കുകയും ചെയ്യുകയായിരുന്നു. എന്നാല്‍, ഇതിനെതിരെ അണ്ണാ ഡി.എം.കെയും മണ്ഡലത്തിലെ സ്വതന്ത്ര സ്ഥാനാര്‍ഥിയും ഉള്‍പ്പെടെയുള്ളവരാണ് ഹൈക്കോടതിയെ സമീപിച്ചത്. എന്നാല്‍, ഹരജിയില്‍ ഇടപെടാന്‍ വിസമ്മതിച്ച ജഡ്ജിമാരായ എസ്. മണികുമാറും സുബ്രമണ്യം പ്രസാദും കേസ് തള്ളുകയായിരുന്നു.