ഇംഫാല്‍: മണിപ്പൂരില്‍ ഇന്ന് ബി.ജെ.പിക്ക് നിര്‍ണായക ദിനം. ബി.ജെ.പിയുടെ നേതൃത്വത്തിലുള്ള സഖ്യ സര്‍ക്കാരിനെതിരെ കോണ്‍ഗ്രസ് മുന്നോട്ടുവെച്ച അവിശ്വാസ പ്രമേയത്തില്‍ ഇന്ന് വോട്ടെടുപ്പ് നടക്കും.

പ്രത്യേക നിയമസഭാ സമ്മേളനത്തില്‍ പങ്കെടുക്കണമെന്നും മുന്നണിക്ക് ണനുകൂലമായി വോട്ടു ചെയ്യണമെന്നും കാണിച്ച് കോണ്‍ഗ്രസും ബി.ജെ.പിയും തങ്ങളുടെ എം.എല്‍.എമാര്‍ക്ക് വിപ്പ് നല്‍കിയിട്ടുണ്ട്.

ജൂലായ് 28 നാണ് ബി.ജെ.പി നേതൃത്വത്തിലുള്ള ബിരെന്‍ സിങ് സര്‍ക്കാരിനെതിരെ കോണ്‍ഗ്രസ് അവിശ്വാസ പ്രമേയത്തിന് നോട്ടിസ് നല്‍കിയത്. കോണ്‍ഗ്രസ് എം.എല്‍.എമാരായ കെ മേഘചന്ദ്ര, ടി ലോകേശ്വര്‍ എന്നിവരാണ് സ്പീക്കര്‍ വൈ ഖേംചന്ദ് സിങിന് അവിശ്വാസ പ്രമേയത്തിനായുള്ള നോട്ടിസ് സമര്‍പ്പിച്ചിരുന്നത്.

ഓഗസ്റ്റ് പത്തിന് നടക്കുന്ന നിയമസഭ സമ്മേളനത്തില്‍ വിശ്വാസവോട്ടെടുപ്പ് നടത്തണമെന്ന് കോണ്‍ഗ്രസ് ആവശ്യപ്പെട്ടിരുന്നു.

മുന്‍ ബി.ജെ.പി നേതാവ് ലുഖോസി സൗ ഉള്‍പ്പെട്ട മയക്കുമരുന്ന് കേസ് സി.ബി.ഐക്ക് കൈമാറാനുള്ള പ്രതിപക്ഷത്തിന്റെ ആവശ്യത്തിന് മേല്‍ ബിരെന്‍ സിങ് സര്‍ക്കാര്‍ യാതൊരു നടപടിയും സ്വീകരിക്കാത്ത ഘട്ടത്തിലാണ് അവിശ്വാസ പ്രമേയം കോണ്‍ഗ്രസ് കൊണ്ടുവന്നത്.