നെടുങ്കണ്ടം: നെടുങ്കണ്ടത്ത് ഉണ്ടായ വന്‍ തീപിടിത്തത്തില്‍ ഏക്കറ് കണക്കിന് കൃഷി ഭൂമിയും പുല്‍മേടും കത്തി നശിച്ചു. ഏലം, കുരുമുളക്, കാപ്പി തുടങ്ങിയ വിളകളാണ് ഇന്നലെ ഉച്ചയ്ക്ക് ഉണ്ടായ തീപിടിത്തത്തില്‍ കത്തിയത്.  പുല്‍മേടുകളും കുറ്റിക്കാടുകളും നിറഞ്ഞ പ്രദേശത്ത് ഏകദേശം 50 ഏക്കറിലധികം പുല്‍മേടാണ് കത്തി നശിച്ചത്. ഇതില്‍ നെടുങ്കണ്ടം ബേഡ്‌മെട്ട് പാതിപലത്ത് ബിജുവിന്റെ ഒരേക്കറോളം ഭൂമിയിലെ കൃഷി പൂര്‍ണമായും നശിച്ചു. ബിജുവിന്റെ വീടിനോട് ചേര്‍ന്നു വരെയെത്തിയ തീ നാട്ടുകാരും ഫയര്‍ഫോഴ്‌സിന്റേയും ചേര്‍ന്ന് കെടുത്തിയതോടെ വന്‍ അപകടം വഴിമാറി.  ഉച്ചയോടെ തീ മേഖലയില്‍ പടരുകയായിരുന്നു. നെടുങ്കണ്ടംഅഗ്നിശമനാ സേനയെ വിവരം അറിയിച്ചെങ്കിലും വാഹനത്തിന് പ്രദേശത്ത് എത്തിച്ചേരാന്‍ കഴിഞ്ഞിരുന്നില്ല. പിന്നീടാണ് നാട്ടുകാര്‍ രക്ഷാപ്രവര്‍ത്തനത്തിന് ഏര്‍പ്പെട്ടത്. വലിയ തോതില്‍ ആളി പടര്‍ന്ന തീ നിയന്ത്രണ വിധേയമാക്കാന്‍ വളരെ ബുദ്ധിമുട്ടി. ഹൈറേഞ്ചിലെ പുല്‍മേടുകള്‍ നിറഞ്ഞ പ്രദേശങ്ങളില്‍ തീ പടരുന്നത് പതിവായിരിക്കുകയാണ്.