തൊടുപുഴ: മതനിരപേക്ഷ മാനവിക സംസ്‌കാരത്തിന്റെ ഇടമായ കേരളത്തില്‍ നിന്നും ബി.ജെ.പിക്ക് ഒരു നേട്ടവും കൊയ്യാനാവില്ലെന്ന് സി.പി.എം ജനറല്‍ സെക്രട്ടറി സീതാറാം യെച്ചൂരി. ഇടുക്കി ലോക്‌സഭാ മണ്ഡലത്തിലെ എല്‍.ഡി.എഫ് സ്വതന്ത്ര സ്ഥാനാര്‍ഥി അഡ്വ. ജോയ്‌സ് ജോര്‍ജിന്റെ തെരഞ്ഞെടുപ്പു പ്രചാരണാര്‍ഥം തൊടുപുഴയില്‍ ചേര്‍ന്ന പൊതുസമ്മേളനത്തില്‍ സംസാരിക്കുകയായിരുന്നു അദ്ദേഹം.
വികസന നേട്ടങ്ങള്‍ ചൂണ്ടിക്കാട്ടാനില്ലാതെ വൈകാരികത സൃഷ്ടിച്ച് വോട്ട് നേടാനാണ് മോദിയുടെ ശ്രമം. കേരളത്തിന്റെ മതനിരപേക്ഷ സംസ്‌കാരത്തെ പോലും മോദി വെല്ലുവിളിക്കുന്നു.
ശ്രീനാരായണ ഗുരുവിന്റെ നാടായ കേരളം ഒരുമയുടെ സന്ദേശമാണ് നല്‍കുന്നത്. കേരളത്തിന്റെ ഈ സമാധാനാന്തരീക്ഷം തകര്‍ക്കാനാകുമോ എന്നാണ് ആര്‍.എസ്.എസും ബി.ജെ.പിയും ശ്രമിക്കുന്നത്. കര്‍ഷകരെയും സാധാരണക്കാരെയും യുവാക്കളെയും വഞ്ചിച്ച മോദി സമ്പന്ന വരേണ്യവര്‍ഗത്തിന് ഒത്താശ ചെയ്യുകയാണെന്ന് യെച്ചൂരി കുറ്റപ്പെടുത്തി. കെ.സലീംകുമാര്‍ അധ്യക്ഷനായി. കെ. ഫ്രാന്‍സിസ് ജോര്‍ജ്, ടി.പി പീതാംബരന്‍ മാസ്റ്റര്‍, ഗോപി കോട്ടമുറിക്കല്‍ സംസാരിച്ചു.