തിരുവനന്തപുരം: മതവികാരം വ്രണപ്പെടുത്തിയെന്ന പേരില്‍ ബി.ജെ.പി സംസ്ഥാന പ്രസിഡന്റ് ശ്രീധരന്‍ പിള്ളക്കെതിരേയുള്ള കേസ് ആസൂത്രിതമായ രാഷ്ട്രീയ ഗൂഢാലോചനയുടെ ഭാഗമാണെന്ന് ബി.ജെ.പി. തെരഞ്ഞെടുപ്പ് കമ്മിഷന്‍ അപക്വമായ നിലപാടാണ് സ്വീകരിക്കുന്നത്. ശ്രീധരന്‍ പിള്ളക്കെതിരേ കേസെടുക്കുമെന്ന് തെരഞ്ഞെടുപ്പ് ഓഫിസര്‍ മാധ്യമങ്ങളോടാണ് പറയുന്നത്. വിശദീകരണം പോലും ചോദിക്കാതെയാണ് കേസെടുക്കുമെന്ന് പറയുന്നത്. മാധ്യമങ്ങളിലൂടെ വിചാരണ ചെയ്യുന്ന രീതി ജനാധിപത്യ വിരുദ്ധമാണെന്നും സംസ്ഥാന ജനറല്‍ സെക്രട്ടറി എം.ടി രമേശ് വാര്‍ത്താ സമ്മേളനത്തില്‍ പറഞ്ഞു.
ബി.ജെ.പി പ്രസിഡന്റിനെതിരേ കേസെടുത്ത് പ്രചാരണത്തില്‍നിന്ന് മാറ്റി നിര്‍ത്തി തെരഞ്ഞെടുപ്പ് അട്ടിമറിക്കാനുള്ള ശ്രമമാണ് നടക്കുന്നത്. സംസ്ഥാനത്തിന് പുറത്ത് നടത്തുന്ന രാഷ്ട്രീയ പരാമര്‍ശങ്ങള്‍ക്ക് കേരളത്തിലെ നേതാക്കള്‍ കേസ് കൊടുക്കുന്നതിന്റെ പിന്നില്‍ ചാംപ്യന്മാരാകാനുള്ള ശ്രമാണെന്നും എം.ടി രമേശ് പറഞ്ഞു.