അയോധ്യ: അയോധ്യയില്‍ മസ്ജിദ് നിര്‍മിക്കാന്‍ സംഭാവനകള്‍ തേടി സുന്നി വഖഫ് ബോര്‍ഡ് രൂപീകരിച്ച ഇന്‍ഡോ ഇസ്‌ലാമിക് കള്‍ച്ചറല്‍ ഫൗണ്ടേഷന്‍ എന്ന ട്രസ്റ്റ് രണ്ട് ബാങ്ക് അക്കൗണ്ടുകള്‍ ആരംഭിക്കും.
ഓണ്‍ലൈനായി സംഭാവന സ്വീകരിക്കുന്നതിന് വെബ്‌സൈറ്റും ആരംഭിക്കാന്‍ ട്രസ്റ്റിന്റെ ഓണ്‍ലൈന്‍ മീറ്റിങ്ങില്‍ ധാരണയായി. ബാബരി മസ്ജിദ് തകര്‍ത്തതിന് പകരമായി സുപ്രീം കോടതി വിധി പ്രകാരം അനുവദിച്ച അഞ്ച് ഏക്കര്‍ ഭൂമിയില്‍ മസ്ജിദ്, ആശുപത്രി, സമൂഹ അടുക്കള, ലൈബ്രറി എന്നിവ നിര്‍മിക്കുമെന്ന് ട്രസ്റ്റ് സെക്രട്ടറി അതര്‍ ഹുസൈന്‍ പറഞ്ഞു.
രണ്ട് സ്വകാര്യബാങ്കുകളില്‍ അക്കൗണ്ടുകള്‍ ആരംഭിക്കാനാണ് ട്രസ്റ്റ് തീരുമാനം.
സംഭാവനകള്‍ സ്വീകരിക്കുന്നതിനും കണക്കുകള്‍ സൂക്ഷിക്കുന്നതിനും വേണ്ടി ഒരു ഫിനാന്‍ഷ്യല്‍ ഓഫിസറെ നിയമിച്ചു. മസ്ജിദും മറ്റ് പൊതുസ്ഥാപനങ്ങളും നിര്‍മിക്കുന്നതിന് സംഭാവന നല്‍കാന്‍ നിരവധി പേര്‍ സന്നദ്ധത അറിയിച്ചതായും അതര്‍ ഹുസൈന്‍ അറിയിച്ചു.