ഈരാറ്റുപേട്ട:  മാര്‍ക്കറ്റ ്- വഞ്ചാങ്കല്‍ ലിങ്ക് റോഡില്‍ ഓടകള്‍ സ്ലാബിട്ട് മൂടാത്തത് അപകടങ്ങള്‍ക്ക് കാരണമാകുന്നു. വഞ്ചാങ്കല്‍ ഇറക്കത്തില്‍ നിന്നും മാര്‍ക്കറ്റ് റോഡിലേക്ക് തിരിയുന്ന വലിയ വളവിലെല്ലാം ഓടകള്‍ തുറന്നിട്ട നിലയിലാണ്. പലപ്പോഴും ഇരു ചക്രവാഹനങ്ങളില്‍ വരുന്നവര്‍ ഇവിടെ അപകടത്തില്‍പ്പെടുന്നത് പതിവാണ്. നിയന്ത്രണം വിട്ട വാഹനങ്ങള്‍ നേരെ ഓടയിലേക്ക് വീഴുന്ന അവസ്ഥയാണുള്ളത്. കഴിഞ്ഞ ദിവസം ഇരുചക്രവാഹനം അപകടത്തില്‍പ്പെട്ട ഒരു യുവതിക്കു പരുക്കേറ്റിരുന്നു. രണ്ടു മാസം മുന്‍പ് തലയ്ക്ക്് ഗുരുതരമായി പരുക്കേറ്റ ഒരു യുവാവ് ഒരു മാസത്തോളം മെഡിക്കല്‍ കോളജില്‍ ചികില്‍സയിലായിരുന്നു.
 കഴിഞ്ഞ വര്‍ഷം ടാറിങ് നടത്തിയ കോണ്‍ട്രാക്ടര്‍ ഓട മൂടാതെയാണ് പ്രവൃത്തി പൂര്‍ത്തിയാക്കിയത്. പി.ഡബ്ല്യു.ഡിയുടെ കോണ്‍ട്രാക്ടര്‍ മാര്‍ക്കറ്റ് റോഡിലെ പണി പൂര്‍ത്തിയാക്കിയിട്ടുമില്ല. ഇന്നലെ ഈരാറ്റുപേട്ട ബസ്റ്റാന്‍ഡിനു മുന്നിലെ ഓടയില്‍ കുട്ടിയുടെ കാലകപ്പെട്ട് പരുക്കില്ലാതെ രക്ഷപ്പെടുകയായിരുന്നു.