മുംബൈ: പ്രതിപക്ഷ നേതാവ് രാഹുല്‍ ഗാന്ധിയുടെ നാവരിയുന്നവര്‍ക്ക് 11 ലക്ഷം രൂപ ഇനാം നല്‍കുമെന്ന് ശിവസേന ഷിന്‍ഡെ പക്ഷം എം.എല്‍.എ. വാര്‍ത്ത സമ്മേളനം വിളിച്ചാണ് ബുല്‍ധാന എം.എല്‍.എയായ സഞ്ജയ് ഗെയ്ക്കുവാദ് രാഹുലിനെതിരെ ഭീഷണി മുഴക്കിയത്. 

രാജ്യത്തെ സംവരണ സംവിധാനത്തെക്കുറിച്ച് രാഹുല്‍ ഗാന്ധി അമേരിക്കയില്‍ നടത്തിയ പ്രസ്താവന ഉയര്‍ത്തിക്കാട്ടിയാണ് എം.എല്‍.എയുടെ വെല്ലുവിളി. മഹാരാഷ്ട്രയിലും, രാജ്യം മുഴുവനും സംവരണത്തിന് വേണ്ടി മുറവിളി കൂട്ടുമ്പോള്‍ അത് അവസാനിപ്പിക്കുമെന്നാണ് രാഹുല്‍ ഗാന്ധി പറയുന്നതെന്ന് എം.എല്‍.എ ആരോപിച്ചു. ലോക്‌സഭാ തെരഞ്ഞെടുപ്പില്‍ വോട്ട് തട്ടാന്‍ വേണ്ടി വ്യാജ പ്രചരണങ്ങള്‍ നടത്തുകയും, തെരഞ്ഞെടുപ്പ് കഴിഞ്ഞതോടെ സംവരണം അവസാനിപ്പിക്കുമെന്ന് പറയുകയാണ് രാഹുല്‍ ചെയ്തതെന്നും, കോണ്‍ഗ്രസിന്റെ യഥാര്‍ഥ മുഖം പുറത്തുവന്നെന്നും സഞ്ജയ് ഗെയ്ക്കുവാദ് ആരോപിച്ചു. 

അടുത്തിടെ നടത്തിയ യു.എസ് പര്യടനത്തിലെ രാഹുലിന്റെ പരാമര്‍ശങ്ങളാണ് തെറ്റായ രീതിയില്‍ വളച്ചൊടിച്ച് വിവാദങ്ങളുണ്ടാക്കുന്നത്. ജോര്‍ജ് ടൗണ്‍ സര്‍വകലാശാലയില്‍ നടന്ന വിദ്യാര്‍ഥികളുമായുള്ള സംവാദത്തില്‍ ഇന്ത്യ നീതി നിറഞ്ഞ ഒരു രാജ്യമാകുമ്പോള്‍ മാത്രമേ സംവരണം അവസാനിപ്പിക്കാന്‍ സാധിക്കൂ എന്ന് രാഹുല്‍ ഗാന്ധി പറഞ്ഞിരുന്നു. ഒരു വിദ്യാര്‍ഥിയുടെ ചോദ്യത്തിന് മറുപടിയായാണ് രാഹുല്‍ ഇക്കാര്യം പറഞ്ഞത്. നിലവില്‍ ഇന്ത്യയിലെ അവസ്ഥ അതല്ലെന്നും രാഹുല്‍ വ്യക്തമാക്കിയിരുന്നു. ഇൗ പരാമര്‍ശമാണ് തെറ്റായി വ്യാഖ്യാനിച്ച് രാഹുല്‍ ഗാന്ധിയെ സംവരണ വിരുദ്ധനാക്കി ബി.ജെ.പി വൃത്തങ്ങള്‍ ചിത്രീകരിക്കാന്‍ ശ്രമിക്കുന്നത്. ഭരണഘടന വിരുദ്ധമായ പരാമര്‍ശമാണ് രാഹുല്‍ നടത്തിയതെന്ന് ഉപരാഷ്ട്രപതി ജഗദീപ് ധന്‍കര്‍ വിമര്‍ശിക്കുകയും ചെയ്തിരുന്നു. 

shivsena shinde group mla sanjay gaikwad offer 11 lakh rupees for cutting rahul gandhis tongue