മ്യൂണിക്: സെവിയ്യ യൂറോപ്പാ ലീഗിന്റെ ഫൈനലില്‍ പ്രവേശിച്ചു. കഴിഞ്ഞ ദിവസം നടന്ന സെമി ഫൈനലില്‍ സെവിയ്യയോട് 2-1 എന്ന സ്‌കോറിന് പരാജയപ്പെട്ടാണ് യുനൈറ്റഡ് പുറത്തായത്. മത്സരത്തില്‍ ലഭിച്ച അവസരങ്ങള്‍ മുതലാക്കാന്‍ കഴിയാത്തതാണ് യുനൈറ്റഡിന് വിനയായത്. ഇരു ടീമുകളും മികച്ച മത്സരമാണ് കാഴ്ച വെച്ചത്. മത്സരം തുടങ്ങി ഒമ്പതാം മിനുട്ടില്‍ തന്നെ മാഞ്ചസ്റ്റര്‍ യുണൈറ്റഡ് മുന്നില്‍ എത്തിയിരുന്നു.
പെനാല്‍റ്റി ലക്ഷ്യത്തിലെത്തിച്ചാണ് മാഞ്ചെസ്റ്റര്‍ ലീഡ് എടുത്തത്. റാഷ്‌ഫോര്‍ഡ് നേടിയ പെനാല്‍ട്ടി ബ്രൂണൊ ഫെര്‍ണാണ്ടസ് ലക്ഷ്യത്തില്‍ എത്തിക്കുകയായിരുന്നു. യുനൈറ്റഡിന്റെ ഗോളിന് ശേഷം സെവിയ്യ തുടരെ ഗോള്‍ ശ്രമം നടത്തി. ഒടുവില്‍ 26ാം മിനുട്ടില്‍ സെവിയ്യ സമനില ഗോള്‍ നേടി.
റിഗുലിയന്റെ ക്രോസില്‍ നിന്ന് ഒരു ഇടം കാലന്‍ ഫിനിഷിലൂടെ സുസോ ആണ് സമനില ഗോള്‍ നേടിയത്. സമനിലക്ക് ശേഷം മാഞ്ചസ്റ്റര്‍ യുനൈറ്റഡ് നിരന്തര ഗോളിന് ശ്രമിച്ചെങ്കിലും ശ്രമങ്ങളൊന്നും ഫലം ക@ണ്ടില്ല. സെവിയ്യ ഗോള്‍ കീപ്പര്‍ ബോണോ ശക്തമായി നിന്നതോടെ യുനൈറ്റഡിന്റെ ഗോള്‍ ശ്രമങ്ങളെല്ലാം പാഴായി. 78ാം മിനുട്ടില്‍ വീണുകിട്ടിയ അവസരം മുതലാക്കിയ സെവിയ്യ ഡിയോങ്ങിലൂടെ വിജയ ഗോള്‍ കണ്ടെത്തി. പിന്നീട് യുനൈറ്റഡ് സമനിലക്ക് ശക്തമായി പൊരുതിയെങ്കിലും ഫലമുണ്ട@ായില്ല. അടുത്തിടെ എഫ്. എ കപ്പിന്റെ സെമി ഫൈനലില്‍ നിന്നും മാഞ്ചസ്റ്റര്‍ യുനൈറ്റഡ് പുറത്തായിരുന്നു. അന്ന് ചെല്‍സിയോട് 3-1 എന്ന് സ്‌കോറിനായിരുന്നു യുനൈറ്റഡിന്റെ തോല്‍വി.