കൊച്ചി(കിഴക്കമ്പലം): കിഴക്കമ്പലം അപ്പാരല്‍ പാര്‍ക്ക് മൈതാനത്തു അരങ്ങേറിയ 6582 പേര്‍ പങ്കെടുത്ത മെഗാ തിരുവാതിര ഗിന്നസ് റെക്കോഡുമായി ചരിത്രത്തില്‍ ഇടം നേടി.
ചാവറ കള്‍ച്ചറല്‍ സെന്ററിന്റെയും പാര്‍വണേന്തു സ്‌കൂള്‍ ഓഫ് തിരുവാതിരയുടെയും സഹകരണത്തോടെ കിഴക്കമ്പലം ട്വന്റി20 ആണ് വിപുലമായ രീതിയില്‍ തിരുവാതിര സംഘടിപ്പിച്ചത്. 20 സംസ്ഥാനങ്ങളില്‍ നിന്നുള്ളവര്‍ ചുവടുവച്ചു.
തിരുവാതിര എന്ന കലയെ പുതു തലമുറയ്ക്കു പകര്‍ന്നു നല്‍കുകയും അതോടൊപ്പം ലോക ശ്രദ്ധയില്‍ കൊണ്ടുവരികയും ചെയ്യുക എന്നതാണ് ഈ പരിപാടിയിലൂടെ ലക്ഷ്യമിട്ടതെന്ന് പരിപാടിയുടെ ചീഫ് കോഡിനേറ്ററര്‍ സാബു എം ജേക്കബ് പറഞ്ഞു.
ഏലിയാമ്മ ജേക്കബ് മെഗാ തിരുവാതിര ഉദ്ഘാടനം ചെയ്തു. ബോബി ജേക്കബ്, ഡോണി, ഗിന്നസ് വേള്‍ഡ് റെക്കോര്‍ഡ് പ്രതിനിധി ഋഷി നാഥ്, മാലതി ജി മേനോന്‍, കിഴമ്പലം പഞ്ചായത്തു പ്രസിഡന്റ് കെ.വി ജേക്കബ്, ബി മുരളിധരന്‍ സന്നിഹിതരായി.