പെരിന്തല്‍മണ്ണ: ബൈക്ക് യാത്രക്കാരായ തമിഴ്‌നാട് സ്വദേശികളെ കത്തികാണിച്ചു ഭീഷണിപ്പെടുത്തി ബൈക്കും മൊബൈല്‍ഫോണും കവര്‍ന്ന കേസില്‍ മൂന്നു പേര്‍ പിടിയില്‍. കോഴിക്കോടു നിന്നും വിനോദയാത്ര കഴിഞ്ഞു നാട്ടിലേക്കു ബൈക്കില്‍ യാത്രചെയ്തിരുന്ന കൊയമ്പത്തൂര്‍ സ്വദേശികളായ യുവാക്കളുടെ പണമാണു കവര്‍ന്നത്. താഴെക്കോട് കാപ്പുമുഖത്തു വെച്ചു ബൈക്ക് വിലങ്ങിട്ടു നിര്‍ത്തി കത്തി കാണിച്ച് 3500 രൂപയും മൊബൈല്‍ഫോണും ബൈക്കും തട്ടിയെടുത്ത കേസിലെ പ്രതികളെയാണു പെരിന്തല്‍മണ്ണ പൊലിസ് അറസ്റ്റ് ചെയ്തത്.
തട്ടിപ്പിനിരയായ യുവാക്കളുടെ പരാതിയിന്മേല്‍ പൊലിസ് നടത്തിയ അന്വേഷണത്തിലാണു താഴെക്കോട് സ്വദേശികളായ പുളിക്കുഴിയില്‍ റിസല്‍ ഇബ്‌നുഹംസ(20), ചോലമുഖത്ത് ഷെബീബ്((20), ആലിപ്പറമ്പ് തോണികടവന്‍ കുന്നത്ത് റിഷാബ് (21) എന്നിവരെ സി.ഐ എ.എം സിദ്ദീഖും സംഘവും അറസ്റ്റ് ചെയ്തത്.
തിങ്കളാഴ്ച പുലര്‍ച്ചെ ഏഴിനാണു സംഭവം. ബൈക്കില്‍ യാത്ര ചെയ്തിരുന്ന യുവാക്കളെ പിന്‍തുടര്‍ന്നു വന്ന പ്രതികള്‍ താഴെക്കോട് കാപ്പുമുഖത്ത് ബൈക്ക് വിലങ്ങിട്ട് കത്തിയെടുത്തു വീശി കവര്‍ച്ച നടത്തുകയായിരുന്നു. തുടര്‍ന്നു നടത്തിയ അന്വേഷണത്തില്‍ ബൈക്ക് കണ്ടെണ്ടടുത്തു. പ്രതികളെയും തിരിച്ചറിയുകയായിരുന്നു.
ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു. സി.ഐ.എം സിദ്ധീഖ്, എസ്.ഐ ജോബിതോമസ്, എ.എസ്.ഐ റെജിമോന്‍, അഭിലാഷ്, ഷബീര്‍, ദിനേശന്‍, നിബില്‍ദാസ്, എന്നിവരടങ്ങുന്ന സംഘമാണു പ്രതികളെ അറസ്റ്റ് ചെയ്തത്.