പാറ്റ്‌ന: ബിഹാറില്‍ നിയമസഭാ തെരഞ്ഞെടുപ്പ് അടുത്തിരിക്കേ ബി.ജെ.പി സഖ്യത്തിനെതിരായി രൂപീകരിച്ച മഹാസഖ്യത്തില്‍ തമ്മിലടി. സീറ്റ് വിഭജനത്തില്‍ അതൃപ്തി പ്രകടിപ്പിച്ച് ജിതന്‍ റാം മാഞ്ചിയുടെ നേതൃത്വത്തിലുള്ള ഹിന്ദുസ്ഥാനി അവാമി മോര്‍ച്ച (സെക്യുലര്‍) പാര്‍ട്ടി മഹാസഖ്യം വിട്ടു. മാഞ്ചിയുടെ പാര്‍ട്ടി എന്‍.ഡി.എയ്‌ക്കൊപ്പം ചേരുമെന്നാണ് വിവരം.
സീറ്റ് വിഭജനത്തില്‍ നേരത്തെ തന്നെ ജിതന്‍ റാം മാഞ്ചി കോണ്‍ഗ്രസും ആര്‍.ജെ.ഡിയുമായി ഉടക്കിലായിരുന്നു. വിഷയം ചര്‍ച്ച ചെയ്യാന്‍ സമിതിയെ വയ്ക്കാമെന്നു കോണ്‍ഗ്രസ് നേതൃത്വം ഉറപ്പുനല്‍കിയിരുന്നെങ്കിലും അതുണ്ടായില്ലെന്നാരോപിച്ചാണ് നിലവില്‍ അദ്ദേഹത്തിന്റെ പാര്‍ട്ടി സഖ്യം വിട്ടിരിക്കുന്നത്. ആര്‍.ജെ.ഡി നേതാവ് തേജസ്വി യാദവ് ചെറിയ പാര്‍ട്ടികളെ പരിഗണിക്കുന്നില്ലെന്നും തീരുമാനങ്ങള്‍ ഏകപക്ഷീയമാണെന്നും ജിതന്‍ റാം മാഞ്ചി ആരോപിച്ചിട്ടുണ്ട്.