എടവണ്ണപ്പാറ: വെട്ടുപാറ സി.എച്ച് സെന്റര്‍ ഏര്‍പ്പെടുത്തിയ കെ.വി.എ ഗഫൂര്‍ പുരസ്‌കാരം രോഗീപരിചരണം സേവനമാക്കിയ ഡോ.ശരീഫിന് സമര്‍പ്പിച്ചു. സഊദി നാഷണല്‍ കമ്മിറ്റി സെക്രട്ടറി ആയിരിക്കെ മരണപ്പെട്ട പ്രമുഖ സാമൂഹ്യ പ്രവര്‍ത്തകനായിരുന്ന കെ.വി ഗഫൂറിന്റെ ഓര്‍മക്കാണ്  സി.എച്ച് സെന്റര്‍ പുരസ്‌കാരം ഏര്‍പ്പെടുത്തിയത്.
ജന്മം കൊണ്ട് കൊല്ലം ജില്ലക്കാരനായ ഡോ.ശരീഫ് വളവന്നൂര്‍ യതീംഖാനക്ക് കീഴില്‍ പ്രവര്‍ത്തിക്കുന്ന നഴ്‌സിങ് ഹോമിലെ ഡോക്ടറായാണ് ജില്ലയില്‍ എത്തുന്നത്. പിന്നീട് ഓമാനൂര്‍ പി.എച്ച്.സി, കോഴിക്കോട് മെഡിക്കല്‍ കോളജ് ഉള്‍പ്പെടെ വിവിധയിടങ്ങളില്‍ സേവനം ചെയ്തു. ചെറൂപ്പ ഗവ.ആശുപത്രിയില്‍ നിന്ന് വിരമിച്ചു.  
വെട്ടുപാറയില്‍ നടന്ന പുരസ്‌കാരദാന ചടങ്ങില്‍ സയ്യിദ് റഷീദലി ശിഹാബ് തങ്ങള്‍ പ്രത്യേക മൊമെന്റോയും ഇ.ടി മുഹമ്മദ് ബഷീര്‍ എം.പി പുരസ്‌കാര പത്രവും  ടി.വി ഇബ്രാഹീം എം.എല്‍.എ പുരസ്‌കാരത്തുകയും കൈമാറി. 25,000 രൂപയുടെ പുരസ്‌കാര തുക സി.എച്ച് സെന്ററിന്റെ ജീവകാരുണ്യ പ്രവര്‍ത്തനങ്ങളിലേക്ക് അവാര്‍ഡ് കൈമാറ്റ ചടങ്ങില്‍വച്ച് തന്നെ ഡോക്ടര്‍ കൈമാറി.