കൊല്ലം: ആവണീശ്വരം മദ്യദുരന്തക്കേസില്‍ പ്രതികള്‍ക്കനുകൂലമായി മൊഴി നല്‍കാന്‍ ഫോണിലൂടെ ഭീഷണിപ്പെടുത്തിയതായി സാക്ഷി കോടതിയില്‍ വെളിപ്പെടുത്തി.
അഡീഷണല്‍ ജില്ലാ സെഷന്‍സ് കോടതിയില്‍ നടക്കുന്ന വിസ്താരവേളയിലാണ് കേസിലെ എട്ടാം  സാക്ഷി ആവണീശ്വരം ഷിജു ഭവനില്‍ അലക്‌സാണ്ടര്‍ ഷാജു മൊഴി നല്‍കിയത്. ആവണീശ്വരം ഷാപ്പ് കീപ്പള്ളി അശോകന്റേതാണെന്നും താന്‍ അവിടെ നിന്നും മദ്യപിക്കാറുണ്ടെന്നും ഷാജി കോടതി മുമ്പാകെ വെളിപ്പെടുത്തി. ഷാപ്പിലെ ജീവനക്കാരെ തിരിച്ചറിയാന്‍ പ്രോസിക്യൂഷന്‍ ആവശ്യപ്പെട്ടപ്പോഴാണ് തനിക്ക് ഭീഷണിയുള്ള കാര്യം സാക്ഷി വെളിപ്പെടുത്തിയത്. മൊബൈല്‍ ഫോണിലൂടെയാണ് ഭീഷണി മുഴക്കിയത്. രണ്ടാംപ്രതി സന്തോഷ്‌കുമാര്‍, മരണപ്പെട്ട മൂന്നാംപ്രതി വിക്രമന്‍, ആറാം പ്രതി ബിനു, പത്താംപ്രതി അച്ചായന്‍ എന്നിവര്‍ക്കായിരുന്നു മദ്യവിതരണത്തിന്റെ ചുമതലയെന്ന് ഷാജു വെളിപ്പെടുത്തി.
ദുരന്തത്തിന് ശേഷം മദ്യപാനം പൂര്‍ണമായും ഒഴിവാക്കിയ താന്‍ ഇപ്പോള്‍ മദ്യവിരുദ്ധ പ്രവര്‍ത്തകനാണെന്നും ഷാജു കോടതിയില്‍ മൊഴി നല്‍കി. ചതയദിവസമായതിനാല്‍ മറ്റെവിടെ നിന്നും മദ്യം ലഭിക്കാത്തതുകൊണ്ടാണ് ആവണീശ്വരം ഷാപ്പില്‍ നിന്നുള്ള 'ബോണസ് വിതരണം' കഴിച്ചതെന്നും സാക്ഷി പറഞ്ഞു.
ഇന്നലെ വിസ്തരിച്ച ആറ് സാക്ഷികളില്‍, മദ്യപിച്ച് ചികിത്സയില്‍ കഴിഞ്ഞ മറ്റ് അഞ്ച് സാക്ഷികളും കോടതിയില്‍ മൊഴി മാറ്റി പറഞ്ഞു. ഏഴാം സാക്ഷി വിളക്കുടി മേമല പുത്തന്‍വീട്ടില്‍ സാമുവല്‍, ഒന്‍പതാം സാക്ഷി തലവൂര്‍ ലക്ഷ്മി ഭവനില്‍ സുരേഷ്‌കുമാര്‍, 11ാം സാക്ഷി കുന്നിക്കോട് കടുവാങ്കോട് വീട്ടില്‍ ആനന്ദന്‍, 16ാം സാക്ഷി മഞ്ഞക്കാല കാരോട്ട് വീട്ടില്‍ ഗോപിനാഥപിള്ള, 19ാം സാക്ഷി ആവണീശ്വരം സുബി മന്‍സിലില്‍ സുബൈര്‍ എന്നിവരാണ് കൂറുമാറിയത്.
പ്രോസിക്യൂഷന്‍ ഭാഗം എതിര്‍വിസ്താരത്തില്‍ 10ാം പ്രതി അച്ചായനും 14ാം പ്രതി നൗഷാദും മദ്യവിതരണത്തിനുണ്ടായിരുന്നതായി ഗോപിനാഥപിള്ളയും സുബൈറും മൊഴി നല്‍കി. വിചാരണ 23ന് തുടരും.പ്രോസിക്യൂഷനുവേണ്ടി അഡ്വ. കെ ഗോപീഷ്‌കുമാര്‍, ജി മോഹന്‍രാജ് എന്നിവര്‍ കോടതിയില്‍ ഹാജരായി.