പൊന്നാനി: നിയന്ത്രണം വിട്ട ഓട്ടോറിക്ഷ ക്രൂയിസര്‍ വാനിലും കാറിലും ഇടിച്ച് അപകടം. പൊന്നാനി കുറ്റിപ്പുറം ദേശീയ പാതയില്‍ ചമ്രവട്ടം ജങ്ഷന് സമീപമാണ് അപകടം നടന്നത്. കുറ്റിപ്പുറം പുതുപൊന്നാനി ദേശീയപാതയില്‍ റൗബ റസിഡന്‍സിക്ക് മുന്‍വശത്ത് ഉച്ചയ്ക്ക് മൂന്നരയോടെയാണ് അപകടം സംഭവിച്ചത്. റോഡ് മുറിച്ചു കടക്കുകയായിരുന്ന സ്ത്രീയെയും കുട്ടിയേയും ഇടിക്കാതിരിക്കാന്‍ വേണ്ടി വളച്ച ഓട്ടോയാണ് നിയന്ത്രണം നഷ്ടമായി അപകടത്തില്‍ പെട്ടത്. ഓട്ടോയുടെ നിയന്ത്രണം നഷ്ടമായതോടെ ഗുരുവായൂരില്‍ നിന്ന് കര്‍ണാടകയിലേക്ക് പോകുകയായിരുന്ന ക്രൂയിസര്‍ വാനില്‍ ഇടിച്ച ഓട്ടോ പിന്നീട് ചമ്രവട്ടം ജങ്ഷനില്‍ നിന്ന് വരികയായിരുന്ന കാറില്‍ ഇടിച്ചു. അപകടത്തില്‍ ഓട്ടോ ഡ്രൈവറായ പൊന്നാനി സ്വദേശി ഷണ്‍മുഖന് സാരമായി പരിക്കേറ്റു. ഇയാളെ പൊന്നാനി താലൂക്ക് ആശുപത്രിയില്‍ പ്രവേശിപ്പിച്ചു. അപകടത്തില്‍ മൂന്ന് വാഹനങ്ങളുടെയും മുന്‍ഭാഗം തകര്‍ന്നു.