ഗൂഡല്ലൂര്‍: ഓവാലി പഞ്ചായത്തിലെ കോക്കാലില്‍ കാട്ടാനകള്‍ ആദിവാസി കുടിലുകള്‍ തകര്‍ത്തു. കോക്കാല്‍ ആദിവാസി കോളനിയിലെ കേത്തന്‍, കുള്ളി എന്നിവരുടെ വീടുകളാണ് തകര്‍ത്തത്. കഴിഞ്ഞ ദിവസം രാത്രി സമീപത്തെ വനത്തില്‍ നിന്നെത്തിയ കാട്ടാനയും കുട്ടിയുമാണ് കോളനിയില്‍ നാശം വിതച്ചത്. കാട്ടാന വീടുകളുടെ പിന്‍ഭാഗത്തെ ചുമര്‍ ഇടിച്ചു തകര്‍ക്കുകയായിരുന്നു. ഈ സമയത്ത് വീടുകളിലുണ്ടായിരുന്ന കേത്തന്‍, കുള്ളി എന്നിവരുടെ കുട്ടികളടമുള്ള കുടുംബാംഗങ്ങള്‍ മുന്‍വശത്തെ വാതിലൂടെ രക്ഷപ്പെട്ടു. വിവരമറിഞ്ഞ് റെയ്ഞ്ചര്‍ ചെല്ല ദുരയുടെ നേതൃത്വത്തില്‍ വനപാലകര്‍ തകര്‍ന്ന വീടുകള്‍ സന്ദര്‍ശിച്ചു.കാട്ടാന ശല്യം രൂക്ഷമായ പഞ്ചായത്തില്‍ സമീപകാലത്തായി പത്തോളം വീടുകളാണ് കാട്ടാനകള്‍ തകര്‍ത്തത്.