കൊച്ചി: കൊവിഡ് ബാധിതരെ നിരീക്ഷിക്കുന്നതിനായി ഫോണ്‍ വിവരങ്ങള്‍ ശേഖരിക്കാനുള്ള സര്‍ക്കാര്‍ തീരുമാനത്തിനെതിരെ പ്രതിപക്ഷ നേതാവ് രമേശ് ചെന്നിത്തല സമര്‍പ്പിച്ച ഹരജി ഹൈക്കോടതി തള്ളി. ഫോണ്‍കോള്‍ വിവരങ്ങളില്‍ ടവര്‍ ലൊക്കേഷന്‍ മാത്രമാണ് പരിശോധിക്കുന്നതെന്ന സര്‍ക്കാര്‍ വാദം അംഗീകരിച്ചാണ് ചീഫ് ജസ്റ്റിസ് എസ്. മണികുമാറിന്റെ നേതൃത്വത്തിലുള്ള ബെഞ്ച് ഹര്‍ജി തള്ളിയത്.

രോഗബാധിതരുടെ എണ്ണം കൂടുമ്പോള്‍ സര്‍ക്കാര്‍ നടപടിയില്‍ തെറ്റില്ലെന്ന് ബെഞ്ച് നിരീക്ഷിച്ചു. കൊവിഡ് രോഗികളുടെ ഫോണ്‍രേഖ പരിശോധിക്കുന്നത് സര്‍ക്കാരിന് തുടരാം. സംസ്ഥാനത്ത് ദിവസേന രോഗികളുടെ എണ്ണം വര്‍ധിക്കുകയാണെന്നും നിലവിലെ സാഹചര്യം നിങ്ങള്‍ മനസിലാക്കേണ്ടതല്ലേയെന്നും ചെന്നിത്തലയുടെ അഭിഭാഷകനോട് കോടതി ചോദിച്ചു.

ടവര്‍ ലെക്കേഷന്‍ മാത്രമാണ് പരിശോധിക്കുന്നതെന്ന് സര്‍ക്കാര്‍ കഴിഞ്ഞ ദിവസം സത്യവാങ്മൂലം നല്‍കിയിരുന്നു. കൊവിഡ് ബാധിതരുടെ സമ്പര്‍ക്ക വിവരങ്ങള്‍ അറിയാനാണ് ഫോണ്‍രേഖ പരിശോധിക്കുന്നത്. കോള്‍ വിവരങ്ങള്‍ ശേഖരിക്കുന്നത് ഭരണഘടന വിരുദ്ധമാണെന്ന് ചൂണ്ടികാട്ടിയാണ് ചെന്നിത്തല ഹൈക്കോടതിയെ സമീപിച്ചത്.