കൊണ്ടോട്ടി: കരിപ്പൂര്‍ വിമാനത്താവളത്തില്‍ ഏഴ് യാത്രക്കാരില്‍ നിന്നായി 63 ലക്ഷം രൂപയുടെ സ്വര്‍ണം എയര്‍ കസ്റ്റംസ് ഇന്റലിജന്‍സ് പിടികൂടി. ജിദ്ദയില്‍ നിന്നുള്ള സ്‌പൈസ് ജെറ്റിലെത്തിയ മലപ്പുറം തിരൂരങ്ങാടി സ്വദേശി അബ്ദുല്‍ ലത്തീഫില്‍ നിന്നും 349 ഗ്രാം സ്വര്‍ണമാണ് കണ്ടെത്തിയത്. മൂന്ന് സ്വര്‍ണ ബിസ്‌കറ്റുകള്‍ ബാഗേജിനുളളില്‍ ഹെയര്‍ ക്രീമിനുളളിലായിരുന്നു ഒളിപ്പിച്ചത്. ഇതേ വിമാനത്തിലെത്തിയ താമരശ്ശേരി സ്വദേശി മുഹമ്മദ് സാദിഖില്‍ നിന്നും മിശ്രിത രൂപത്തില്‍ കടത്താന്‍ ശ്രമിച്ച 240 ഗ്രാമാണ് പിടികൂടിയത്.

കുവൈത്തില്‍ നിന്നുളള എയര്‍ഇന്ത്യ എക്‌സ്പ്രസിലെത്തിയ കോഴിക്കോട് കൊടുവളളി ജമാല്‍ അബ്ദുല്‍ റഹീം 272 ഗ്രാം മിശ്രിത രൂപത്തില്‍ കടത്താനായിരുന്നു ശ്രമിച്ചത്.ഷാര്‍ജയില്‍ നിന്നുള്ള എയര്‍ഇന്ത്യ എക്‌സ്പ്രസിലെത്തിയ കോഴിക്കോട് നടുവണ്ണൂര്‍ സ്വദേശി ബഷീര്‍ കുറ്റികണ്ടിയില്‍ നിന്നും സോക്‌സിനുളളില്‍ ഒളിപ്പിച്ചു കടത്തിയ 349 ഗ്രാം പിടികൂടി.

ഇതേ വിമാനത്തിലെത്തിയ പുതുപ്പാടി സ്വദേശി മുഹമ്മദ് ഫസലില്‍ നിന്ന് ശരീരത്തില്‍ ഒളിപ്പിച്ച 700 ഗ്രാം സ്വര്‍ണമാണ് കണ്ടെടുത്തത്. ഷാര്‍ജയില്‍ നിന്നള്ള എയര്‍ഇന്ത്യയിലെത്തിയ കണ്ണൂര്‍ ചൊക്ലി സ്വദേശി അബ്ദുല്‍ സാലിത്, ഇന്‍ഡിഗോയില്‍ അബൂദാബിയില്‍ നിന്നെത്തിയ കോഴിക്കോട് ഇരിങ്ങല്‍ സ്വദേശി ഷംസുദ്ദീന്‍ മലയില്‍ എന്നിവരില്‍ നിന്നായി 788 ഗ്രാം മിശ്രിത രൂപത്തിലുളള സ്വര്‍ണമാണ് കണ്ടെടുത്തത്.