തിരുവനന്തപുരം : വോട്ടെടുപ്പ് ദിനത്തില്‍ വോട്ടര്‍മാരെ സഹായിച്ച് കാലാവസ്ഥയും.
ചിലയിടങ്ങളില്‍ മഴ പെയ്തതൊഴിച്ചാല്‍ സംസ്ഥാനത്ത് പൊതുവെ മഴയോ കടുത്തചൂടോ ഇല്ലാത്ത കാലാവസ്ഥയാണ് അനുഭവപ്പെട്ടത്.
അന്തരീക്ഷ താപനില ഏറ്റവും കൂടുതല്‍ തിരുവനന്തപുരത്തും പാലക്കാട്ടും 36.2 ഡിഗ്രിയും കോഴിക്കോട്ട് 36.1 ഡിഗ്രിയും പുനലൂര്‍ 36 ഡിഗ്രിയും രേഖപ്പെടുത്തി. വയനാട്, പാലക്കാട്, കോഴിക്കോട്, തൃശൂര്‍, എറണാകുളം, കോട്ടയം, തിരുവനന്തപുരം ജില്ലയിലെ ചിലയിടങ്ങളിലാണ് ഇന്നലെ മഴയെത്തിയത്.
കഴിഞ്ഞ ദിവസങ്ങളില്‍ വയനാട്ടിലും പത്തനംതിട്ടയിലും ശക്തമായ മഴയുണ്ടാകുമെന്ന് മുന്നറിയിപ്പുണ്ടായിരുന്നു. വോട്ടെടുപ്പ് ദിവസം ശക്തമായ മഴ മുന്നറിയിപ്പുകള്‍ ഇല്ലായിരുന്നെങ്കിലും വയനാട് പലയിടങ്ങളിലും വോട്ടെടുപ്പ് മന്ദഗതിയിലാക്കുംവിധം മഴ പെയ്തു. ഇന്ന് വയനാട്, മലപ്പുറം, പാലക്കാട്, ഇടുക്കി, കോട്ടയം, ആലപ്പുഴ, പത്തനംതിട്ട, കൊല്ലം, തിരുവനന്തപുരം ജില്ലകളില്‍ മഴയ്ക്കു സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം.