പയ്യന്നൂര്‍: പയ്യന്നൂരില്‍ തെരഞ്ഞെടുപ്പ് ഡ്യൂട്ടിക്കിടെ തളിപ്പറമ്പ് ഡിവൈ.എസ്.പിയുടെ സ്‌ട്രൈക്കര്‍ വാഹനം നിയന്ത്രണംവിട്ട് മതിലിനിടിച്ചു. കണ്ണന്‍സ് ട്രാവലറാണ് അപകടത്തില്‍പെട്ടത്. ഇന്നലെ ഉച്ചയ്ക്ക് 3.30ഓടെ പയ്യന്നൂര്‍ അമ്പലത്തിന് സമീപത്തെ മതിലിലാണ് ട്രാവലര്‍ ഇടിച്ചത്. ട്രാവലറിന്റെ ഡ്രൈവര്‍ കവ്വായി സ്വദേശി സനോജ് (35) ദേഹാസ്വാസ്ഥ്യത്തെ തുടര്‍ന്നു കുഴഞ്ഞു വീണതോടെ വാഹനത്തിന്റെ നിയന്ത്രണം നഷ്ടപ്പെട്ടു. വാഹനത്തിലുണ്ടായിരുന്ന മലബാര്‍ സ്‌പെഷല്‍ പൊലിസിലെ പൊലിസ് ഓഫിസര്‍ അനീഷാണ് വാഹനം നിര്‍ത്തിയത്. ഇദ്ദേഹത്തിന്റെ അവസരോചിതമായ ഇടപെടലാണ് അപകടത്തില്‍ നിന്നു പൊലിസ് ഓഫിസര്‍മാരെ രക്ഷിച്ചത്. കാടാമ്പുഴ സ്വദേശിയായ ഇദ്ദേഹം സര്‍വിസില്‍ കയറിയിട്ട് ഒരു വര്‍ഷമേ ആയിട്ടുള്ളു. സ്‌ട്രൈക്കര്‍ വാഹനത്തില്‍ രണ്ടു വനിതാ പൊലിസുമാരും മലബാര്‍ സ്‌പെഷല്‍ പൊലിസിലെ ആറു പൊലിസുകാരുമാണ് ഉണ്ടായിരുന്നത്. സനോജിനെ പയ്യന്നൂര്‍ സഹകരണ ആശുപത്രിയില്‍ പ്രവേശിപ്പിച്ചു.