കാക്കനാട്: പ്രളയത്തില്‍ ദുരിതത്തിലായവരെ സഹായിക്കുന്നതിനു വേണ്ടി എസ്.കെ.എസ്.എസ്.എഫ്് വിഖായ പ്രവര്‍ത്തകര്‍ നടത്തിയ പ്രവര്‍ത്തനങ്ങള്‍ക്ക് അഭിന്ദന പ്രവാഹം. കടുങ്ങല്ലൂര്‍, ഏലൂര്‍, പാനായിക്കുളം, പറവൂര്‍ മേഖലകളില്‍ സര്‍ക്കാര്‍ സംവിധാനങ്ങള്‍ പോലും എത്തിപ്പെടാന്‍ താമസം നേരിട്ട മേഖലകളിലും വിഖായയുടെ പ്രവര്‍ത്തന ഫലമായി നുറുക്കണക്കിന് ആളുകളുടെ ജീവന്‍ രക്ഷിക്കാന്‍ സാധിച്ചിരുന്നു. ദുരന്തമുഖത്ത് മനസ്സിനെ കീഴ്‌പ്പെടുത്തിയ ചിത്രങ്ങളിലൊന്നായി സമൂഹമാധ്യമങ്ങളില്‍ ഏറെ ചര്‍ച്ച ചെയ്ത ചിത്രങ്ങളും വിഖായ പ്രവര്‍ത്തകരുടെ ശ്രമദാനങ്ങളാണ്.
രാജ്യത്ത് മൃഗങ്ങളുടെ പേരില്‍ കൊലപാതകങ്ങള്‍ നടക്കുമ്പോള്‍ മിണ്ടാപ്രാണിയാണെന്ന ബോധത്തോടെ പ്രളയ മുഖത്ത് നിന്നും പശുക്കളെ രക്ഷപ്പെടുത്തുന്ന ചിത്രങ്ങള്‍ ദേശീയ മാധ്യമങ്ങളില്‍ വരെ ശ്രദ്ദേയമായിരുന്നു. വെള്ളം ഉള്‍വലിഞ്ഞതിനു ശേഷവും വിഖായയുടെ നേതൃത്വത്തില്‍ 150 ഓളം വിഖായ പ്രവര്‍ത്തകര്‍ വിവിധ മേഖലകളില്‍ വീടും പരിസരവും ശുചീകരിക്കുന്ന പ്രവര്‍ത്തനങ്ങളും നടത്തിക്കൊണ്ടിരിക്കുകയാണ്. ബലിപ്പെരുന്നാള്‍ ദിനത്തിലും നമസ്‌ക്കാരത്തിനു ശേഷം ആഘോഷങ്ങള്‍ ഒഴിവാക്കി വിഖായ പ്രവര്‍ത്തകര്‍ ശുചീകരണ പ്രവര്‍ത്തനത്തിലായിരുന്നു.
ക്യാംപുകളില്‍ നിന്നും വീട്ടിലേക്ക് തിരിച്ചെത്തിയ ആളുകളെ സഹായിക്കുന്നതിനു വേണ്ടി ആവശ്യ സാധനങ്ങള്‍ ശേഖരിക്കാന്‍ ഇടപ്പള്ളി പുക്കാട്ടുപടി റൂട്ടില്‍ മുണ്ടംപാലം ജങ്ഷനു സമീപം പ്രത്യേക കേന്ദ്രം തുറന്നു. തുടര്‍ ഇവ വിഖായയുടെ നേതൃത്വത്തില്‍ എത്തച്ചുകൊടുക്കുകയും ചെയ്തുകൊണ്ടിരിക്കുന്നു. കൂടുതല്‍ മേഖലകളില്‍ ദുരിത ബാധിതരെ സഹായിക്കുന്ന പദ്ധതിക്കും ജില്ലയില്‍ രൂപം നല്‍കിയിരിക്കുകയാണ്.
എസ്.കെ.എസ്.എസ്.എഫ് സംസ്ഥാന അധ്യക്ഷന്‍ പാണക്കാട് സയ്യിദ് ഹമീദലി ശിഹാബ് തങ്ങളുടെ നേതൃത്വത്തില്‍ സംസ്ഥാന നേതാക്കള്‍ ജില്ലയിലെ ദുരിത ബാധിത പ്രദേശങ്ങള്‍ സന്ദര്‍ശിക്കുകയും കൂടുതല്‍ സഹായങ്ങള്‍ എത്തിക്കുകയും ചെയ്യുമെന്ന് എസ്.കെ.എസ്.എസ്.എഫ് ജില്ലാ ഭാരവാഹികള്‍ അറിയിച്ചു.