കൂത്തുപറമ്പ്: കൂത്തുപറമ്പിലെ സ്വകാര്യ ലോഡ്ജില്‍ ക്വാറന്റൈനില്‍ കഴിയുകയായിരുന്ന പ്രവാസിയായ യുവാവിനെ സ്വര്‍ണക്കടത്തുമായി ബന്ധപ്പെട്ട് തട്ടിക്കൊണ്ടു പോകാനുള്ള ശ്രമത്തിനിടെ സംഘര്‍ഷം. സംഭവത്തില്‍ ആറുപേര്‍ റിമാന്‍ഡില്‍. ഞായറാഴ്ച വൈകിട്ടായിരുന്നു സംഭവം. പിടിയിലായവര്‍ ഉള്‍പ്പെടെ പത്തുപേര്‍ക്കെതിരെയാണു കൂത്തുപറമ്പ് പൊലിസ് കേസെടുത്തത്.
ഉളിക്കല്‍ നുച്യാട് സ്വദേശികളും സഹോദരങ്ങളുമായ കെ.സി സന്തോഷ്, കെ.സി സനീഷ്, മാങ്ങാട്ടിടം കണ്ടേരിയിലെ പി.കെ സജീര്‍, ചിറ്റാരിപ്പറമ്പിലെ പി.പി സജീര്‍, കോട്ടയം മലബാര്‍ കൂവപ്പാടിയിലെ ടി.വി റംഷാദ്, കൈതേരി വട്ടപ്പാറയിലെ കെ.കെ റിനാസ് എന്നിവരെയാണു പൊലിസ് അറസ്റ്റുചെയ്തത്. ഇവരെ കോടതി റിമാന്‍ഡ് ചെയ്ത് കൊവിഡ് നിരീക്ഷണ കേന്ദ്രത്തിലേക്കു മാറ്റി. സന്തോഷും സനീഷും ഉള്‍പ്പെടെ അഞ്ചുപേര്‍ക്കെതിരെ ദിന്‍ഷാദിനെ തട്ടിക്കൊണ്ടു പോകാന്‍ ശ്രമിച്ചതിനും ദിന്‍ഷാദ് ഉള്‍പ്പെടെ അഞ്ചുപേര്‍ക്കെതിരെ സംഘര്‍ഷമുണ്ടാക്കിയതിനുമാണ് കേസ്. ഇതില്‍ മലപ്പുറം സ്വദേശികളായ രണ്ടുപേരും ദില്‍ഷാദും പരുക്കേറ്റ് ചികിത്സയിലാണ്.
രണ്ടാഴ്ച മുന്‍പ് നെടുമ്പാശ്ശേരി വിമാനത്താവളം വഴി ദുബൈയില്‍ നിന്നെത്തി കൂത്തുപറമ്പിലെ സ്വകാര്യ ലോഡ്ജില്‍ ക്വാറന്റൈനില്‍ കഴിഞ്ഞുവന്ന കോഴിക്കോട് പേരാമ്പ്ര സ്വദേശിയായ ദിന്‍ഷാദിനെയാണു തട്ടിക്കൊണ്ടുപോകാന്‍ ശ്രമിച്ചത്. ഇയാളുടെ ഭാര്യ വീട് ഇരിട്ടിയിലാണ്. ദിന്‍ഷാദിനു കൂത്തുപറമ്പില്‍ ബന്ധുക്കളുമുണ്ട്. കൊവിഡ് നിരീക്ഷണ കാലാവധി കഴിഞ്ഞ് വീട്ടിലേക്കു പോകാനായി ലോഡ്ജില്‍ നിന്നും ഇറങ്ങുന്നതിനിടെയാണ് മലപ്പുറത്ത് നിന്നെത്തിയ ക്വട്ടേഷന്‍ സംഘം യുവാവിനെ തട്ടിക്കൊണ്ടുപോകാന്‍ ശ്രമിച്ചത്. ഇതിനിടെ ദിന്‍ഷാദിന്റെ ബന്ധുകളും സഹൃത്തുക്കളും സ്ഥലത്തെത്തിയതോടെ ഇരുവിഭാഗങ്ങളും തമ്മില്‍ ലോഡ്ജിനു മുന്നില്‍ സംഘര്‍ഷമുണ്ടായി. വിവരമറിഞ്ഞ് സി.ഐ ബിനുമോഹന്‍, എസ്.ഐ പി. ബിജു എന്നിവരുടെ നേതൃത്വത്തില്‍ പൊലിസെത്തിയാണ് പ്രതികളെ അറസ്റ്റുചെയ്തത്.
ഇരുസംഘങ്ങളും എത്തിയ മൂന്നു കാറുകളും പൊലിസ് കസ്റ്റഡിയിലെടുത്തു.
സംഭവത്തിനു പിന്നില്‍ സ്വര്‍ണക്കടത്തുമായി ബന്ധപ്പെട്ട തര്‍ക്കമാണെന്നാണു വിവരം. ക്വാറന്റൈനില്‍ കഴിഞ്ഞ ദിന്‍ഷാദ് വിദേശത്തു നിന്നു വരുമ്പോള്‍ മലപ്പുറം സ്വദേശിക്കു കൈമാറാനായി 50 ലക്ഷത്തോളം രൂപയുടെ സ്വര്‍ണം കൊണ്ടുവന്നിരുന്നതായും സ്വര്‍ണം ഉടമയ്ക്കു കൈമാറാത്തതോടെയാണ് ഇയാളെ തേടി ക്വട്ടേഷന്‍ സംഘം കൂത്തുപറമ്പില്‍ എത്തിയതെന്നും പൊലിസ് പറഞ്ഞു.
ഇതേതുടര്‍ന്ന് ഇയാളെ തട്ടിക്കൊണ്ടുപോകാനുള്ള ശ്രമത്തിനിടെ ഇയാളുടെ സുഹൃത്തുക്കള്‍ സ്ഥലത്തെത്തിയതാണു സംഘര്‍ഷത്തിന് ഇടയാക്കിയത്. സംഭവത്തില്‍ കൂടുതല്‍ പേര്‍ ഉള്‍പ്പെട്ടിട്ടുണ്ടോയെന്ന് അന്വേഷിച്ചുവരികയാണെന്നു പൊലിസ് പറഞ്ഞു.