മുക്കം: ലോക്‌സഭാ തെരഞ്ഞെടുപ്പില്‍ തിരുവമ്പാടി നിയോജക മണ്ഡലത്തില്‍ രേഖപ്പെടുത്തിയത് 81.26 ശതമാനം പോളിങ്. സംസ്ഥാന ശരാശരിയേക്കാള്‍ ഉയര്‍ന്നതാണിത്. ജില്ലയില്‍ വയനാട് ലോക്‌സഭാ മണ്ഡലത്തില്‍ ഉള്‍പ്പെടുന്ന ഏക നിയമസഭാ മണ്ഡലമാണ് തിരുവമ്പാടി. മണ്ഡലത്തില്‍ ആകെയുള്ള 1,70,289 വോട്ടര്‍മാരില്‍ 1,38,388 പേര്‍ സമ്മതിദാനാവകാശം വിനിയോഗിച്ചു.
174 പോളിങ് ബൂത്തുകളായിരുന്നു മണ്ഡലത്തില്‍ സജ്ജീകരിച്ചിരുന്നത്. ഭൂരിഭാഗം പോളിങ് ബൂത്തുകളിലും 80 ശതമാനത്തിനു മുകളിലാണ് പോളിങ് നില. 84,658 പുരുഷ വോട്ടര്‍മാരില്‍ 67,032 പേരും 85,630 സ്ത്രീ വോട്ടര്‍മാരില്‍ 71,356 പേരും വോട്ട് ചെയ്തു. തിരുവമ്പാടി മണ്ഡലത്തിലെ പുരുഷ വോട്ടര്‍മാരുടെ പോളിങ് ശതമാനം 79.17 ആണെങ്കില്‍ സ്ത്രീകളുടേത് 83.33 ആണ്. ഒരു ട്രാന്‍സ്‌ജെന്‍ഡര്‍ വോട്ടര്‍ പട്ടികയില്‍ ഉണ്ടായിരുന്നെങ്കിലും വോട്ട് രേഖപ്പെടുത്തിയിട്ടില്ല.