തിരുവനന്തപുരം: ഓണക്കാലത്ത് മദ്യവില്‍പ്പനയില്‍ കൂടുതല്‍ ഇളവുകളനുവദിച്ച് എക്‌സൈസ് വകുപ്പ്. മദ്യവില്‍പ്പന രാവിലെ ഒന്‍പതു മണി മുതല്‍ രാത്രി ഏഴു വരെയാക്കിയിട്ടുണ്ട്. തിരക്കു നിയന്ത്രിക്കാനാണ് നിയന്ത്രണങ്ങള്‍ പിന്‍വലിച്ചതെന്നാണ് എക്‌സൈസ് വകുപ്പിന്റെ വിശദീകരണം.

ഒരു തവണ ടോക്കണെടുത്തു മദ്യം വാങ്ങിയവര്‍ക്ക് വീണ്ടും മദ്യം വാങ്ങാന്‍ മൂന്നു ദിവസത്തെ ഇടവേള നിര്‍ബന്ധമാക്കിയതും താല്‍കാലികമായി പിന്‍വലിച്ചതോടെ ഇനി ഏതു ദിവസവും മദ്യം വാങ്ങാമെന്ന സ്ഥിതിയായി. ഇതോടെ ഓണക്കാലത്ത് യഥേഷ്ടം മദ്യം ലഭിക്കുമെന്ന സാഹചര്യമാണ്.

ബെവ് ക്യൂ ആപ്പിലൂടെ ഒരു ദിവസം വിതരണം ചെയ്യേണ്ട ടോക്കണുകളുടെ എണ്ണവും വര്‍ധിപ്പിച്ചു. നിലവില്‍ ഒരു ദിവസം 400 ടോക്കണുകള്‍ വിതരണം ചെയ്തിടത്ത് 600 ടോക്കണ്‍ വരെ ഇനി അനുവദിക്കും.