കാലടി: അപ്രതീക്ഷിതമായ പ്രളയത്തില്‍ കാലടി സംസ്‌കൃത സര്‍വകലാശാലക്കുണ്ടായത് കോടികളുടെ നഷ്ടം. സര്‍വകലാശാല കാംപസില്‍ വെള്ളം കയറാത്ത ഒറ്റ കെട്ടിടം പോലും ഇല്ല. പ്രാഥമിക കണക്കെടുപ്പില്‍ തന്നെ നഷ്ടം പത്ത് കോടിയിലധികമാണ്.
പ്രളയക്കെടുതിയില്‍ സര്‍വകലാശാലയുടെ പ്രവര്‍ത്തനം പൂര്‍ണമായും നിലച്ച അവസ്ഥയിലാണ്. ജനറേറ്ററുകളും കണ്‍ട്രോള്‍ പാനലുകളുമടക്കം എല്ലാ വൈദ്യുതി സൗകര്യങ്ങളും പൂര്‍ണമായും തകരാറിലായി. വെള്ളവും ചെളിയും കയറി തകരാറിലായ അഡ്മിനിസ്‌ട്രേഷന്‍ ഡിപ്പാര്‍ട്ട്‌മെന്റ് പ്രവര്‍ത്തനക്ഷമമാക്കണമെങ്കില്‍ ചുരുങ്ങിയത് രണ്ടാഴ്ചയിലധികം വേണ്ടി വരും.
ഈ കെട്ടിടത്തിന്റെ താഴത്തെ നിലയില്‍ പ്രവര്‍ത്തിക്കുന്ന എന്‍ജിനീയറിങ്, ഇന്റേണല്‍ ക്വാളിറ്റി അഷ്വുറന്‍സ് സെല്‍, കേരളാ സ്റ്റേറ്റ് ഓഡിറ്റ് ഡിപ്പാര്‍ട്ട്‌മെന്റ് റീജ്യനല്‍ ഓഫിസ്, ജനറല്‍ സ്റ്റോര്‍ തുടങ്ങിയ വിഭാഗങ്ങളും വെള്ളം കയറി പ്രവര്‍ത്തന രഹിതമായി. വിവിധ സെന്ററുകളിലേക് വിതരണത്തിനായി എത്തിച്ചിരുന്ന അറുപതോളം കംപ്യൂട്ടറുകളും പേപ്പറുകളടക്കമുള്ള സ്റ്റേഷനറി സാമഗ്രികളും പൂര്‍ണമായും നശിച്ചു.
സര്‍വകലാശാലയിലെ കൂത്തമ്പലം, പെയിന്റിങ് വിഭാഗം, പെണ്‍കുട്ടികളുടെയും ആണ്‍കുട്ടികളുടെയും ഹോസ്റ്റലുകള്‍, ഡേ കെയര്‍ സെന്റര്‍, ഗസ്റ്റ് ഹൗസ് എന്നിവിടങ്ങളിലും നഷ്ടങ്ങളുണ്ടായി. പ്രിന്റിങ് പ്രസ് പൂര്‍ണമായും വെള്ളത്തില്‍ മുങ്ങി ലക്ഷങ്ങള്‍ വിലമതിക്കുന്ന യന്ത്രങ്ങള്‍ ഉപയോഗ ശൂന്യമായി.
നൃത്ത, നാടക പഠന വിഭാഗത്തിലെ ഉപകരണങ്ങളും വെള്ളം കയറി നശിച്ചവയില്‍ പെടുന്നു. ഹോസ്റ്റലുകള്‍ വെള്ളത്തില്‍ മുങ്ങിയതിനാല്‍ വിദ്യാര്‍ഥികളുടെ സര്‍ട്ടിഫിക്കറ്റുകളും ലാപ്‌ടോപ്പ് അടക്കമുള്ള സാധന സാമഗ്രികളും നഷ്ടപ്പെട്ടു.
സര്‍വകലാശാലയിലെ ഏറ്റവും വലിയ നഷ്ടം ചിത്ര മതിലിന് സംഭവിച്ച നാശമാണ്. ഇത് പുനര്‍നിര്‍മിക്കുക എന്നുള്ളത് ശ്രമകരമായ ദൗത്യമാണ്. കാംപസിലെ കുടിവെള്ള സൗകര്യങ്ങളടക്കം പൂര്‍ണമായും പ്രവര്‍ത്തനക്ഷമമാക്കണമെങ്കില്‍ വളരെയധികം സമയമെടുക്കും.