ഷില്ലോങ്: സംസ്ഥാനത്തെ ഏറ്റവും വലിയ ഒറ്റക്കക്ഷിയെ തീരുമാനിക്കുന്ന ഉപതെരഞ്ഞെടുപ്പില്‍ മേഘാലയ മുഖ്യമന്ത്രിയും നാഷനല്‍ പീപ്പിള്‍സ് പാര്‍ട്ടി (എന്‍.പി.പി) പ്രസിഡന്റുമായ കോണ്‍റാഡ് സാങ്മക്ക് ജയം. സൗത്ത് തുറയില്‍ 8,400 വോട്ടിന്റെ ഭൂരിപക്ഷത്തിലാണ് സാങ്മ വിജയിച്ചത്.
കോണ്‍ഗ്രസ് സ്ഥാനാര്‍ഥി ഷാര്‍ലറ്റ് ഡബ്ല്യു മൊമിനെയാണ് സാങ്മ പരാജയപ്പെടുത്തിയത്. ഇതോടെ 60 അംഗങ്ങളുള്ള സഭയില്‍ കോണ്‍ഗ്രസിനും എന്‍.പി.പിക്കും 20 സീറ്റുകളാകും. എന്‍.പി.പി നേതൃത്വം നല്‍കുന്ന ആറ് കക്ഷികളുടെ സഖ്യമായ മേഘാലയ ഡെമോക്രാറ്റിക് അലയന്‍സാണ് സംസ്ഥാനത്തെ ഭരണകക്ഷി.
22,200 വോട്ടുകള്‍ പോള്‍ ചെയ്ത സൗത്ത് തുറയില്‍ 13, 656 വോട്ടുകള്‍ നേടിയാണ് സാങ്മയുടെ വിജയം. നിലവില്‍ എന്‍.സി.പി, ബി.ജെ.പി, യു.ഡി.പി എന്നിവരുടെ പിന്തുണയും എന്‍.പി.പിക്കുണ്ട്. ബി.ജെ.പിക്ക് ഇവിടെ രണ്ട് സീറ്റുകളും എന്‍.സി.പിക്ക് ഒരു സീറ്റും പ്രാദേശിക പാര്‍ട്ടികളായ യു.ഡി.പി (7), എച്ച്. എസ്.ഡി.പി (2) സീറ്റുകള്‍ വീതവുമാണ് ഉള്ളത്.