കൊണ്ടോട്ടി: തദ്ദേശ സ്ഥാപനങ്ങളിലേക്കുളള തെരഞ്ഞെടുപ്പിന്റെ അന്തിമ വോട്ടര്‍ പട്ടികയും സംവരണ വാര്‍ഡുകളുടെ നറുക്കെടുപ്പും അടുത്തമാസത്തോടെ പൂര്‍ത്തിയാവും. കഴിഞ്ഞ 12 മുതല്‍ 26 വരെ വോട്ട് ചേര്‍ത്തവരെ ഉള്‍പ്പെടുത്തിയാണ് അന്തിമ വോട്ടര്‍ പട്ടിക തെരഞ്ഞെടുപ്പ് കമ്മിഷന്‍ പ്രസിദ്ധീകരിക്കുന്നത്.
സംവരണ വാര്‍ഡുകളിലേക്കുളള തെരഞ്ഞെടുപ്പും അടുത്ത മാസം നടക്കും. ഓരോ വാര്‍ഡിലും മല്‍സരിക്കുന്നതിന് ജനറല്‍, വനിത, പട്ടികജാതി, പട്ടികവര്‍ഗ സംവരണ സീറ്റുകള്‍ നറുക്കെടുപ്പ് നടത്തിയാണ് നിശ്ചയിക്കുക. ഇതിന് ശേഷം പ്രസിഡന്റ്, വൈസ് പ്രസിഡന്റ്, സ്റ്റാന്‍ഡിങ് കമ്മിറ്റി എന്നീ സ്ഥാനങ്ങളിലേക്കുളള സംവരണ നറുക്കെടുപ്പും നടത്തും. സംവരണ സീറ്റുകളുടെ എണ്ണം നേരത്തെ തന്നെ തെരഞ്ഞെടുപ്പ് കമ്മിഷന്‍ ക്ലിപ്തപ്പെടുത്തിയിട്ടുണ്ട്.