ന്യൂഡല്‍ഹി: രാജ്യം ഇപ്പോള്‍ നേരിടുന്ന സാമ്പത്തിക പ്രതിസന്ധിയും ജി.എസ്.ടി വരുമാന നഷ്ടവും കൊവിഡ് മഹാമാരി കാരണമാണെന്നും അതു ദൈവത്തിന്റെ കളിയാണെന്നും പറഞ്ഞ കേന്ദ്ര ധനമന്ത്രി നിര്‍മല സീതാരാമനെ വിമര്‍ശിച്ചും ചോദ്യം ചെയ്തും കോണ്‍ഗ്രസ് നേതാവും മുന്‍ ധനമന്ത്രിയുമായ പി. ചിദംബരം രംഗത്ത്. നിര്‍മല സീതാരാമനെ ദൈവത്തിന്റെ സന്ദേശമെത്തിയക്കുന്നയാള്‍ എന്നു കളിയാക്കിയ ചിദംബരം, കൊവിഡിനു മുന്‍പ് എന്തുകൊണ്ടാണ് സാമ്പത്തികരംഗത്ത് വലിയ തകര്‍ച്ചയുണ്ടായതെന്ന് അവര്‍ വ്യക്തമാക്കണമെന്നും ആവശ്യപ്പെട്ടു.
കൊവിഡ് വ്യാപനം ആരംഭിക്കുന്നതിനു മുന്‍പ് കേന്ദ്രസര്‍ക്കാരിനു പറ്റിയ വീഴ്ചകള്‍ ധനമന്ത്രി വിശദീകരിക്കണമെന്ന് ചിദംബരം ആവശ്യപ്പെട്ടു. ഇന്ത്യയുടെ സാമ്പത്തിക രംഗത്തു കൊവിഡ് വ്യാപനത്തിനു മുന്‍പുതന്നെ വലിയ പ്രതിസന്ധി രൂപപ്പെട്ടിരുന്നു. കൊവിഡിനെ ദൈവത്തിന്റെ കളിയെന്നാണ് നിങ്ങള്‍ വിലയിരുത്തുന്നതെങ്കില്‍, നിങ്ങളുടെ ഉത്തരവാദിത്തബോധമില്ലായ്മയേയും ദുര്‍ഭരണത്തെയും എങ്ങനെയാണ് വ്യാഖ്യാനിക്കുന്നതെന്നുകൂടി ജനങ്ങളോടു വ്യക്തമാക്കണമെന്നും ചിദംബരം ആവശ്യപ്പെട്ടു. 2017-18, 2018-19, കൊവിഡിനു മുന്‍പത്തെ 2019-20 എന്നീ സാമ്പത്തിക വര്‍ഷങ്ങളില്‍ എന്തുകൊണ്ടാണ് ഇന്ത്യയുടെ സാമ്പത്തികരംഗം താഴോട്ടുപോയതെന്നു വിശദീകരിക്കുമോയെന്നു ചോദിച്ച അദ്ദേഹം, ഇക്കാര്യത്തില്‍ ധനമന്ത്രിക്ക് ഒന്നും പറയാനില്ലേയെന്നും ചോദിച്ചു.
സാമ്പത്തിക രംഗത്തെ പ്രതിസന്ധികള്‍ സര്‍ക്കാരിന്റെ പിടിപ്പുകേടാണെന്നും കൊവിഡിനു മുന്‍പുതന്നെ ഇന്ത്യയുടെ സാമ്പത്തിക ഘടന തകര്‍ന്നിരുന്നെന്നും ആരോപിച്ച് രാഹുല്‍ഗാന്ധിയടക്കമുള്ള കേണ്‍ഗ്രസ് നേതാക്കള്‍ നേരത്തേതന്നെ രംഗത്തെത്തിയിരുന്നു.