കീവ്: യുക്രൈന്‍ തലസ്ഥാനമായ കീവില്‍ ഉണ്ടായ കാര്‍ബോംബ് സ്‌ഫോടനത്തില്‍ മാധ്യമപ്രവര്‍ത്തകന്‍ കൊല്ലെപ്പെട്ടു. സ്വതന്ത്ര വാര്‍ത്താ വെബ്‌സൈറ്റായ യുക്രയിന്‍സ്‌ക പ്രവ്ദയില്‍ ജോലിചെയ്തു വരുകയായിരുന്ന പ്രശസ്ത മാധ്യമപ്രവര്‍ത്തകനായ പാവെല്‍ ഷെറെമെറ്റ് ആണ് കൊല്ലപ്പെട്ടത്. റഷ്യന്‍ പൗരനാണ് ഇയാള്‍.

ഇവാന ഫ്രാങ്ക് തെരുവില്‍ വെച്ചായിരുന്നു സംഭവം. കാറോടിച്ചുവരുകയായിരുന്നു അദ്ദേഹം. കാര്‍ വളവിലെത്തിയ ഉടനെ പൊട്ടിത്തെറിക്കുകയായിരുന്നു. ബോംബ് റിമോട്ട് നിയന്ത്രിതമാണെന്നും 400 മുതല്‍ 600 ഗ്രാം വരെ ടിഎന്‍ടി ഇതില്‍ അടങ്ങിയിരുന്നതായും ഔദ്യോഗിക വൃത്തങ്ങള്‍ പറഞ്ഞു. പാവെലിന്റെ മരണം കൊലപാതകമാണെന്ന് പ്രോസിക്യൂട്ടര്‍ ജനറല്‍ യുറിവ് ലുട്ട്‌സെങ്കോ ഫേസ്ബുക്കില്‍ കുറിച്ചു.