വെഞ്ഞാറമൂട് : ശക്തമായ കാറ്റിലും മഴയിലും വാമനപുരം മേഖലയില്‍ വ്യാപക നാശനഷ്ടം. ഒട്ടേറെ വീടുകള്‍ക്ക് നാശനഷ്ടമുണ്ടായി. വൈദ്യുതി പോസ്റ്റ് ഒടിഞ്ഞുവീണ് വൈദ്യുതിവിതരണം താറുമാറായി. വാമനപുരം സാമൂഹ്യാരോഗ്യ കേന്ദ്രത്തിനു സമീപം അജിതാ മന്ദിരത്തില്‍ ശാന്തമ്മയുടെ വീടിന്റെ ഷീറ്റു മേഞ്ഞ മേല്‍ക്കൂര കാറ്റില്‍ പറന്നു പോയി. വാമനപുരം പുതമനവീട്ടില്‍ രുഗ്മിണി അമ്മയുടെ വീടിന്റെ അടുക്കള ഭാഗത്തെ ഷീറ്റു മേഞ്ഞ മേല്‍ക്കൂര കാറ്റില്‍ പറന്നു പോവുകയും ചുമരുകള്‍ ഇടിഞ്ഞു വീഴുകയും ചെയ്തു. വാമനപുരം കുറ്റൂര്‍ ക്ഷേത്രത്തിനു സമീപം മഠത്തില്‍് വീട്ടില്‍ അനില്‍ കുമാര്‍, ജി.എസ്. വിഹാറില്‍ ഗിരിജ എന്നിവരുടെ വീടുകള്‍ക്ക് മുകളിലേക്ക് മരം പിഴുത് വീണ് മേല്‍ക്കൂരകള്‍ക്ക് കേടുപറ്റി.വാമനപുരം ഗോമതി ഭവനില്‍ മേല്‍കൂര നിലം പൊത്തിയ നിലയില്‍ കളമച്ചല്‍ ലേഖാ ഭവനില്‍ സുധര്‍മ്മിണിയുടെ വീടിന്റെ മേല്‍ക്കൂര കാറ്റില്‍ നിലം പൊത്തുകയും ചുമരുകള്‍ ഇടഞ്ഞു വീഴുകയും ചെയ്തു. വാമനപുരം പാലത്തിനു സമീപമുള്ള സംസം റസ്റ്റോറന്റിന്‍ ഒരു ഭാഗത്തേക്ക് സമീപത്തെ മരും പിഴുത് വീണ് ഷെഡ്ഡുകളിലൊന്നിനു സാരമായ കേടു പറ്റി. കാരേറ്റ് ജംഗ്ഷനു സമീപം ഇലക്ട്ിക് പോസ്റ്റ് നിലം പൊത്തി മണിക്കൂറുകളോളം പ്രദേശത്ത് വൈദ്യുതി മുടങ്ങി.

മലയോരത്തും കനത്ത നാശം

നെടുമങ്ങാട് : ശക്തമായ മഴയും കാറ്റും മലയോര മേഖലയില്‍ നാശം വിതച്ചു.
കഴിഞ്ഞ ദിവസങ്ങളില്‍ പെയ്ത കനത്ത മഴയിലും കാറ്റിലും ഇടി മിന്നലിലുമാണ് വ്യാപകമായ നാശ നഷ്ട്ടങ്ങള്‍ ഉണ്ടായത്.
നിരവധി കൃഷിയിടങ്ങള്‍ കാറ്റില്‍ നിലം പൊത്തി. പ്രധാനമായും വാഴ കൃഷിയാണ് നശിച്ചത്.
ഇടിമിന്നലില്‍ നെടുമങ്ങാട് വെള്ളൂര്‍ക്കോണത്ത് വീട് തകര്‍ന്നു.
വെള്ളൂര്‍ക്കോണം കുരിശ്ശടിയ്ക്കു സമീപം താമസിക്കുന്ന ബൈജുവിന്റെ വീട്ടിലാണ് ബുധനാഴ്ച രാത്രി ഇടിമിന്നലേറ്റ് നാശനഷ്ടമുണ്ടായത്.
വീട്ടിനുള്ളിലെ ഫാന്‍, ലൈറ്റ്, സ്വിച്ച് ബോര്‍ഡുകള്‍ എന്നിവ കത്തിനശിച്ചു. വീട്ടിനു പുറത്ത് സ്ഥാപിച്ചിരുന്ന വൈദ്യുതമീറ്റര്‍, പമ്പ് സെറ്റ്, പി.വി.സി പൈപ്പുകൊണ്ടുള്ള വാട്ടര്‍ കണക്ഷനുകള്‍ തുടങ്ങിയവയെല്ലാം തകര്‍ന്നു.
വീടിന്റെ പലയിടങ്ങളിലും വിള്ളല്‍ വീണു. വീടിനടുത്തുള്ള വാഴകള്‍ക്കും തെങ്ങിനും തീ പിടിച്ചു. ബൈജുവും ഭാര്യ പ്രിയയും ഈ സമയം വീട്ടിലുണ്ടായിരുന്നെങ്കിലും ഇവര്‍ക്ക് മറ്റു അപകടങ്ങളൊന്നും സംഭവിച്ചില്ല. സമീപവാസികളായവരുടെ വീടുകളിലെ കംപ്യൂട്ടര്‍, ടി.വി, ഫ്രിഡ്ജ്, ലൈറ്റുകള്‍ തുടങ്ങിയ ഇലക്ട്രിക് ഇലക്ട്രോണിക്‌സ് ഉപകരണങ്ങള്‍ക്കും കേടു സംഭവിച്ചിട്ടുണ്ട്.
പലസ്ഥലങ്ങളിും വൈദ്യുത കേബിള്‍ കണക്ഷനുകള്‍ വിഛേദിക്കപ്പെട്ടു. പ്രദേശത്തെ നിരവധി വീടുകളില്‍ വൈദ്യുത ഉപകരണങ്ങള്‍ നശിച്ചു. മഴയിലും കാറ്റിലും ഇടിമിന്നലിലും നാശനഷ്ടം സംഭവിച്ചവര്‍ക്ക് അടിയന്തിരമായി ധനസഹായം നല്‍കണമെന്ന് വാര്‍ഡ് മെംബര്‍ സി.രജിതകുമാരി അധികൃതരോട് ആവശ്യപ്പെട്ടു.